Her er prosjekta Vegvesenet vil bruka 105 milliardar på

203 milliardar kroner. Altså 203 tusen millionar. Det har Stortinget vedtatt at Statens vegvesen kan bruka dei neste seks åra.

Tysdag presenterer Vegvesenet korleis og kvar dei vil prioritera å nytta desse pengane. 105 milliardar skal gå til investeringar.

Dei peikar ut totalt 429 prosjekt.

Det kallar dei «gjennomføringsplanen for perioden 2022-2027».

Dette er Vegvesenet si praktiske oppfølging av Nasjonal transportplan (NTP) for åra 2022–2033.

Stortinget vedtok NTP i mars i fjor. Vegvesenet har ein viss fridom til å prioritera innanfor den ramma.

Dei 13 viktigaste

Vegvesenet prioriterer følgande lange strekningar (les meir her):

• E39 Stavanger–Bergen inkl. Ringveg øst
• E134 Kongsberg–Haugesund
• E16 Hønefoss–Arna
• Rv. 4 Oslo–Gjøvik
• E39 Ørsta/Volda–Kristiansund
• E6 Steinkjer–Nordland grense
• Rv. 80/E6/E8 Bodø–Tromsø
• E16/rv. 350 Eggemoen–Hønefoss–Hokksund
• Rv. 52 Gol–Lærdal (Borlaug)
• Rv. 3 Elverum–Ulsberg
• E6 Dombås–Ulsberg
• E10 Tjeldsund–Å
• Rv. 94/E6/E45 Hammerfest – Riksgrense Finland

Sjekk fylket ditt

Her er Vegvesenet sin fylkesvise oversikt over deira tiltak i perioden 2022-2027:

• Agder
• Innlandet
• Møre og Romsdal (NB: Møreaksen er ikkje markert i kartet)
• Nordland
• Oslo
• Rogaland
• Troms og Finnmark
• Trøndelag
• Vestfold og Telemark
• Vestland
• Viken

Det som skal brukast pengar på dei neste seks åra, inkluderer prosjekt som:

• er under bygging
• startar opp i perioden 2022–2027
• planleggast for perioden 2028–2033

Hovland viser til at dei siste tjue åra har personbiltrafikken i Noreg auka 23 prosent. Tungbiltrafikken har auka 60 prosent. Riksvegferjene har fått 65 prosent fleire køyretøy.

Trekker fram Rogfast og Hordfast

Utbyggingsdirektør i Vegvesenet, Kjell Inge Davik, karakteriserer det øvste prosjektet på prioriteringslista slik:

– Ny E39 mellom Stavanger og Bergen er «vår Bergensbane».

Han samanliknar det dermed med jernbaneutbygginga på byrjinga av 1900-talet, som kosta «eit heilt års statsbudsjett» på den tida.

Davik viser til at utvida bu- og arbeidsregionar vil betra utviklingsmoglegheitene kraftig.

Rogfast er under bygging, medan det er sett av 1 milliard kroner til Hordfast i seksårsperioden.

For heile strekninga Stavanger-Bergen skriv Vegvesenet at ein «kan ha bygd ut strekninga innan 2040, men då med usikkerheit hefta til Bokn-Hope og Bømlafjordtunnelen.»

Samanlikninga med bygginga av Bergensbanen får SV til å sjå raudt.

– Det blir heilt feil å kalla Hordfast «vår Bergensbane». Det nye stortingsfleirtalet etter valet i haust prioriterer ny og rassikker Bergensbane og E16 mellom Arna og Voss høgast.

Det seier Marthe Hammer i SV. Ho viser til at Senterpartiet seinast i går tok til orde mot å prioritera Hordfast.

Dei viktigaste

Davik trekker fram at ny E39 Ålesund-Molde (Møreaksen) er eit like viktig og positivt prosjekt som Rog- og Hordfast.

– Dette er ein utruleg verdiskapande region, der ny veg vil skapa svært god dynamikk.

Han nemner også riksveg 4 Oslo-Gjøvik, og at utbygginga på Alnabru er eit nav som blir ekstremt viktig for Austlandsregionen.

– For Nord-Noreg er i dag E6 einaste transportåra på land til landsdelen. Me jobbar systematisk med å utbetra den, seier utbyggingsdirektøren.

Utset Nordhordlandstunnelen

Derimot har Vegvesenet ikkje prioritert å starta første byggetrinn av Ringveg Aust i Bergen. Dermed blir det ikkje oppstart for ny E39 nord i Bergen i denne seksårsperioden.

Planen er tunnel mellom Vågsbotn og Nordhordlandsbrua. Dette er ein av 13 prioriterte nasjonale vegstrekningar. Og Vegvesenet har tidlegare lova byggjestart i 2026–2027.

No skriv dei at byggjestart kan bli utsett heilt til 2040.

«For Ringveg øst har ein for Vågsbotn-Klauvaneset og Arna-Vågsbotn ein kommunedelplan til godkjenning i Bergen kommune, og byggjestart i perioden 2028–2033 eller 2033–2040 vil vere mogleg.»

– Utsetjinga er heilt uakseptabel. Me kjem til å trappa opp aksjonane.

Det seier aksjonsleiar for Nordhordlandstunnelen, Jørund Vandvik.

– Glede og uro

Samferdselsminister Jon Ivar Nygård deltok i framlegginga av gjennomføringsplanen.

Han understrekar det som også den førre regjeringa slo fast: Eit styrande mål er å få «meir for pengane».

– Lista me får sjå i dag vil gleda mange og sikkert gi uro for andre, seier statsråden.