– Eg liker å stemma på valdagen for å få kjensla av at valdagen er her, seier statsminister Erna Solberg.
Høgre-leiaren kom gåande til fots til stemmelokala på Skjold skule i Bergen like før klokka 10.30 måndag.
Vel inne var Solberg rask bak gardina, men måtte vente med å legga stemma si i urna til mannen var ferdig.
– Eg liker valkamp, så eg skulle gjerne hatt ei veke til, seier Solberg.
– Høgtid
Høgre-leiaren seier målet er 25 prosent, og at det andre målet er å behalda borgarleg regjering.
–Det er alltid gøy og høgtid med valdag. Eg er usikker på korleis valet kjem til å utarte seg, seier ho.
– Vil du fortsetta som partileiar om du ikkje vinn?
– Akkurat no skal me ta veljarane sin dom, og så ta all anna diskusjon etter valet, seier Solberg.
Også Frp- leiar Sylvi Listhaug hadde venta med å stemma til valdagen. Ho og ektemannen stemte på Hovseter skule i Oslo.
– Endeleg skal ein avgje stemma etter å ha jobba hardt heile valkampen, seier Listhaug.
–Eit maraton
– Eg er veldig stolt av innsatsen ho har gjort og heile partiet. No er det berre å venta på det endelege resultatet, seier mannen til Listhaug, Espen Espeset.
Listhaug seier det har vore eit maraton og mimrar tilbake til årets valkamp.
– Beste stunda var då me gjorde det bra i skulevalet, som ingen hadde spådd. Eg hadde ein god magefølelse, og den slo til, seier ho.
Partileiar i MDG, Une Bastholm, var sistemann ut av partileiarane til å stemma. Ho stemte på Foss vidaregåande skule i Oslo.
– Det er mykje som står på spel for oss, så eg er først og fremst spent, seier ho.
Det er spesielt spennande for partileiaren om dei kjem seg over sperregrensa.
– Eg trur det er sannsynleg at me kjem over sperregrensa, men eg er førebudd på begge deler, seier Bastholm.
Fleire har førehandsstemt
Fleire av partileiarane har valt å førehandsstemma. Audun Lysbakken, partileiar i SV, stemte allereie 27. august i Bergen.
Bjørnar Moxnes (Raudt), Jonas Gahr Støre (Ap), Guri Melby (V) og Trygve Slagsvold Vedum (Sp) stemte i går.