Førre veke vart den 6,4 kilometer lange Fjærlandstunnelen på riksveg 5 stengd i eitt døgn etter eit ras inne i tunnelen. På begge sider av tunnelen vaks køane.
Personbilar kunne enkelt snu, medan vogntoga stod skårfaste. I time etter time etter time.
– Hadde snuplassane vore utanfor tunnelane, ville også yrkestrafikken hatt moglegheit til å snu når det er stengt, seier Rolf Olav Tenden, dagleg leiar i transportverksemda Thor Tenden Transport AS.
Han får støtte frå seniorkonsulent Magne Ahlin i Slinde Transport.
– Det burde ikkje vere så omfattande å lage til løysingar slik at tungtrafikken kan snu, seier han.
– Fordel for redningstenesta også
Jon Askeland er fylkesordførar i «tunnelfylket» Vestland.
– Eg trur lastebileigarane peikar på noko viktig. Det er vanskeleg, for ikkje å seie umogleg, for vogntog å snu inne i tunnelane, seier han.
Tunnelane i Noreg er regulert i EUs tunneldirektiv og Tunnelsikkerhetsforskrifta. Regler for «havarinisjer, snunisjer og møteplassar» er beskrive i Vegdirektoratet si handbok N500, men omhandlar berre snuplassar inni tunnelane – ikkje utanfor.
Brannsjef i Aurland, Reinhardt Sørensen, seier snuplassar på utsida av tunnelar også vil vere ein fordel for redningstenestene.
– Når det er så mykje stengingar, hadde det vore fint for oss å ha ein plass utanfor å sette frå oss utstyr på, seier han.
I september var han i aksjon då ein kjempestein fall frå taket i Berdaltunnelen.
– Kan skape farlege situasjonar
Avdelingsdirektør i Statens vegvesen, Svenn Egil Finden, peiker på at omsynet til trafikktryggleik gjer at det er uheldig med snu-nisjar like utanfor tunnelopninga.
– Det kan skape farlege situasjonar, forklarar han.
Det er Statens vegvesen som har ansvaret for den 6397 meter lange Fjærlandstunnelen, som vart stengd førre veke. Uhellet skjedde i samband med at det vart laga ein snuplass for brøytebilar – inni tunnelen.
1. januar i år vart ansvaret for fylkesvegnettet overført frå Statens vegvesen til dei nye fylka. Fylkesdirektør for infrastruktur og veg i Vestland, Dina Lefdal, vil ikkje spekulere i kva nye snuplassar vil kunne koste.
– Vi har ikkje oversikt kva dette eventuelt vil medføre av kostnader for fylkeskommunen, seier ho.
– Ikkje eit alternativ å bli ståande i timevis
Sigurd Reksnes er fylkesleiar for Senterpartiet i Vestland. Snuplassar utanfor tunnelane «bør kunne løysast på ein enkel måte», seier han.
– Dette er ei næring som lever av å vere punktlege. Då er det ikkje noko alternativ å bli ståande i timevis.
Bård Hoksrud (Frp) er fraksjonsleiar i transport- og kommunikasjonskomiteen på Stortinget. Han varslar at han vil følgje opp ønsket om fleire snuplassar på nasjonalt nivå.
– Eg vil be samferdselsministeren sjå på moglegheitene for å kunne etablere snuplassar også for tungtransporten. Eg trur det er fullt mogleg, seier han.
Samferdselsdepartementet har ikkje svart på NRK si førespurnad.