Videoen som blei tatt opp av dashbord-kameraet i vogntoget syner tydeleg dramatikken. Ein personbil kjem over i feil køyrefelt, treff venstre framhjul på vogntoget og vogntoget mistar kontrollen.
– Vi vil ikkje spekulere noko i årsaka til ulukka, men videoen syner jo sitt, seier kommersiell direktør i det latviske transportfirmaet Kreiss, Pavel Solovjovs.
Det var magasinet Anlegg & Transport som først omtala saka.
Fråteken førarkortet
Det var 5. april i år ulukka skjedde, men først no har Kreiss offentleggjort videoen som syner korleis personbilen kjem over i feil køyrefelt.
I bilen sat fire ungdomar, to av dei blei køyrde til sjukehus i Førde, to andre måtte til legevakt. Føraren av personbilen, ein mann i 20-åra, blei fråteken førarkortet på staden.
– Det er på bakgrunn av mistanke om at personbilen har kome over i feil køyrefelt, sa innsatsleiar i politiet, Roger Gundersen, til NRK.
Måtte bergast ut
Førarhuset på vogntoget blei knust inn i fjellveggen i samanstøyten og sjåføren måtte bergast ut av redningsmannskapa som kom til staden.
– Han er kraftig forslått og har smerter i ein fot, men han har vore innom oss på kontoret og forsikra om at han ikkje har meir alvorlege skader, seier Pavel Solovjovs i Kreiss.
Solovjovs er glad for at sjåføren filma det som hende.
Fleire har den siste tida tatt til orde for at dashcam bør vere på plass i alle store bilar. Blant anna mangeårig sjef for Tenden Transport i Stryn, Rolf Olav Tenden.
– Kamera burde vore standardutstyr og regulert slik at til dømes forhandlar, politi eller forsikringsselskap kan hente ut informasjonen, sa han til NRK nyleg.
BERGA UT: Slik såg det ut på ulukkesstaden på riksveg 15 mellom Kjøs og Markane i Nordfjord.
Foto: Bendikte Grov / NRK
