Her kjem det ny tunnel

– Vi skulle nok gjerne ynskt at byggestarten kunne kome noko tidlegare, seier Noralv Distad som er ordførar i Aurland.

Den rasutsette strekka er allereie i dag ein del av E16 mellom Oslo og Bergen, og den vert i Nasjonal Transportplan framheva som ein viktig korridor for transport mellom Austlandet og Vestlandet.

Men vegen har ofte vore stengd i lengre periodar på grunn av steinsprang.

• LES OGSÅ: Stort steinras i Nærøydalen
• LES OGSÅ: E16 stengt etter ras

– Her er det store rasfare og det er viktig at planlegging no kjem i gang raskt. Vi hadde jo store forhåpningar då Liv Signe Navarsete tidlegare sa at dette skulle skje raskt.

• LES OGSÅ: Lovar fleire 100 millionar til rassikring

I 2009 lova dåverande samferdsleminister Liv Signe Navarsete at regjeringa ville løyve fleire 100 millionar kroner til rassikring i Norge, og at rassikringa av E16 i Nærøydalen ville kome inn på statsbudsjettet allereie i 2010.

– Det har diverre latt vente på seg.

Viktig samband aust – vest

Prosjektet strekkjer seg langs E16 frå Hylland i Aurland (hovudparsell 9, km ca. 4,2) til Sleen i Voss (hovudparsell 1, ca. km 5,7), ei veglengd langs eksisterande veg på om lag 9 kilometer.

I tillegg er det nokre kommunale vegar i Voss kommune i planområdet, og den verna vegen i gamle Stalheimskleivi er riksveg. Grensa mellom Aurland og Voss kommunar går ved Glashammaren, om lag ein kilometer nedanfor Stalheimskleivi.

(SAKA HELD FRAM UNDER KARTET)

Teljingar som Statens vegvesen har gjort syner at om lag 2 000 køyretøy passerer i døgeret, av dette utgjer tungtrafikken om lag 24 %.

I strekninga som skal erstattast inngår Sivletunnelen på 1114 meter og Stalheimstunnelen på 1188 meter. Statens vegvesen har førebels ikkje noko endeleg prislapp på prosjektet.

– Det er noko planarbeidet skal avklare, men vi passerer nok milliarden og kanskje også 1,5 milliard, seier Ingar Hals, prosjektleiar i Statens vegvesen.

Håpar på anleggstart i 2018

Prosjektet er ikkje inne i første fireårsperioden av Nasjonal Transportplan, men Statens vegvesen set no i gang planarbeidet.

– Vi jobbar no ut ifrå at det kan bli anleggsstart i 2018, og då vil det vel kunne stå ferdig i 2021 eller der omkring.

I Aurland ventar ordførar Noralv Distad utolmodig, men er glad for at planarbeidet no kjem i dag.

• LES OGSÅ: Nytt ras i Nærøydalen
• LES OGSÅ: Rasfare stopper rydding av ras

– Dette er ein uhyre viktig veg ikkje berre for Aurland, det er jo også hovudvegen mellom Oslo og Bergen. Det er mange stader at standarden må på vegen må hevast og dette er ein av dei, så vi håpar dette blir realisert så raskt som råd.