– Eg såg føre meg at vi kom til å få ein lang stopp i arbeidet, seier Inge Melkevoll som driv maskinentreprenørfirmaet Melkevoll Maskin i Oldedalen.
Det var ein av sjåførane hans som oppdaga noko litt uvanleg då han byrja med grunnarbeidet på ei tomt i Olden i starten av førre månad. Dei sende bilete av funna til arkeologane i Vestland fylkeskommune for å finne ut kva dette kunne vere.
Forhistorisk kulturminne
– Kokegroper er tilverkingsrom for mat som vi ofte finn i lag med andre busetjingsspor som hus, åkerflater og gravminne. Det er derfor viktig å undersøkje området. Det fortel fagleiar for feltarkeologi i Vestland fylkeskommune, Glenn Heine Orkelbog.
Han er klar på at Melkevoll har gjort alt rett og seier dei prioriterer å undersøkje slike funn raskt slik at arbeidet på staden kan fortsette.
– Kulturminnelova seier at ein er pliktig til å seie ifrå når ein gjer slike funn. Då er det ekstra kjekt når det er historieinteresserte folk som gjer slike funn, seier Orkelbog.
Heiv seg rundt
Han var ikkje sein om å ta turen til Olden for å få sett på funna etter at Melkevoll hadde tatt kontakt.
– Vi fann to fine kokegroper som vi no jobbar med å få datert. Eg tippar at dei kan vere frå vikingtida, men dei kan og vere endå eldre, seier Orkelbog.
I løpet av ein halv dag fekk dei gjort seg ferdige med undersøkingane og entreprenør Inge Melkevoll kunne halde fram med arbeidet sitt. Han synest på si side det er fasinerande å finne gamle spor av menneskeleg aktivitet.
–No er eg spent på å høyre kor gamle desse gropene er, seier Melkevoll.