Mange ber til høgare makter om meir snø - her har dei for augneblinken meir enn nok...

– Det er strålande snøforhold her nett no. Vi har ikkje lyst på så veldig masse meir akkurat no, for då kan det bli skredfare. Så dette er perfekt for oss, seier Tor Yttri.

Han er styreleiar i Bratt Moro som også i år arrangerer Fjellsportfestivalen i fjella rundt Sogndal. Her handlar det om bratt moro i snø og is, og gode snøforhold er alfa omega om festivalen skal gå som planlagt.

– Vi er strålande nøgde med den snøen vi har fått. Den er lett og fin og perfekt å køyre på ski på, seier Yttri til NRK.no.

• LES OGSÅ: Eit busslass med klimaflyktningar frå Trøndelag kjem til Fjellsportfestivalen

Budd på storinntrykk

Og det er ikkje utan grunn at han gler seg litt ekstra over dei fine forholda. I eit fylke der mangelen på snø nesten har fått folk til å gå ut av sitt gode skinn i vinter, er det mange som gliser litt ekstra når dei ser dei fine forholda i Sogndalsdalen.

På Markane i Stryn er det så lite snø at Hovudlandsrennet har blitt flytta ut av fylket, men i Sogndal er det altså slett ikkje slik.

På Sogndal skisenter Hodlekve er det nemleg yrande liv midt i vinterferieveka, og når Fjellsportfestivalen startar torsdag er det venta storinntrykk av endå fleire.

– Vi er veldig klare for å få besøk av masse folk, seier dagleg leiar ved skisenteret, Cecilie Grendahl.

• LES OGSÅ: Her har dei grunn til å juble over knallstart på vintersesongen
• LES OGSÅ: Ny skiheis opnar eldorado for frikøyring og toppturar

(Artikkelen held fram under)

Ny heis opnar for nye moglegheiter

Skisenteret opna nyleg ein ny heis til Rindabotnen, og den opnar opp for nye moglegheiter for dei som er glade i å stå på ski.

– Vi håpar at vi endeleg kan få litt besøk i den nye heisen vår. Der er det både snøsikkert og godt preparert, lovar senterleiaren.

Med den nye heisen kan skisenteret opne opp for skiglade langt tidlegare på året, og Grendahl er heilt trygg på at investeringane vil svare seg.

– Denne heisen gir også eit godt utgangspunkt for toppturar for dei som ønskjer å ta seg ut på fjellet, seier ho.

Også Tor Yttri set pris på nye tilbod i skisenteret.

– Vi seier alltid at vi har den beste snøen, og det lovar vi framleis. I tillegg gjer heisen i Rindabotnen til at vi kan utvikle festivalen endå meir og ta nye steg, så vi gler oss til årets festival, seier han.

• LES OGSÅ: «Det har rett og slett vore draumefestivalen for oss»
• LES OGSÅ: Fleire hundre møtte opp for å sjå ein gjeng med «gærninger» kaste seg i fjorden