Aldri før har Kirkens Bymisjon opplevd at så mange rumenarar kjem på denne tida av året. No er dei 28 plassane dei har disponible for heimlause alt for lite.
– Slik skal det ikkje vere. Vi treng rett og slett eit større lokale, seier Sebastian Schwalbach, som er ansvarleg for akuttovernattingen ved Kirkens Bymisjon.
Tek i bruk kyrkja
For å bøta på mangelen av overnattingstilbod, blir Korskirken i Bergen sentrum no teken i bruk.
– Vi kan tilby overnatting her i kyrkjerommet, seier gateprest Trygve Stabrun og peikar rundt seg i Korskirken.
Det er tomt for feltsenger og dyner, men på kyrkjebenkane er det lagd fram teppe til dei heimlause som treng ein plass å sove.
– Her kan ein legge seg til rette slik ein finn det best og der det er varmast, seier Stabrun.
- Les òg:
Men det er uvisst kor lenge ein kan halde Korskirken open for dei som treng tak over hovudet om natta.
– Torsdag har vi jubileum, og ein stor rig her. Difor kan vi ikkje ha dette tilbodet så lenge, seier Stabrun.
Går uvisse netter i møte
– Eg veit ikkje kva eg gjer dersom det er fullt og familien ikkje har nokon stad å sove, seier Julian Filip.
Han kjem til Kirkens Bymisjon for å finne ein stad å sove, og ser bekymra rundt seg når han får vite at akuttovernattingstilbodet er overfylt.
– I naudstilfelle må vi kanskje finne ein garasje eller ein plass kor det er litt varmt og det ikkje regnar, seier Filip.
- Les òg:
Gateprest Stabrun meiner det må fleire tiltak til.
– Denne situasjonen seier mykje om behovet vi har i Bergen, avsluttar han.