Bebuarane i huset heldt ein låg profil og gjorde ikkje stort ut av seg, og blir i lokalsamfunnet skildra som stille og rolege.
Men innanfor veggene vart det dyrka cannabis i stor stil. I midten av februar beslagla politiet minst 15 kilo som var klar for sal. Kripos analyserer no styrkegraden.
I tillegg beslagla politiet nokre hundre stiklingar som var sett i dyrking.
Politiet reknar det som ein middels stor plantasje, med eit potensial på cannabisproduksjon til 5,4 millionar kroner.
I alt er fire litauiske statsborgarar varetektsfengsla, sikta for grov narkotikakriminalitet. Ingen av dei med tilknyting til Høyanger. Tre av dei utan tilknyting til Noreg.
– Strafferamma er fengsel i ti år. Slik sett er dette ei alvorleg sak, seier politiadvokat John Lode Roscoe ved Vest politidistrikt.
Kjøpt i fjor haust
Det var informasjon frå Tollvesenet som sette politiet på sporet av plantasjen i det avsidesliggande huset i Høyanger.
Blant dei varetektsfengsla er den 62 år gamle kvinna som kjøpte oppussingsobjektet i fjor haust.
Ifølgje kvinna si forklaring såg ho føre seg fisketurar, oppussing og kanskje utleige av bustaden, som kosta 450.000 kroner.
Kvinna vart pågripen i huset saman med sonen (39) og ein kamerat (40) av han. 62-åringen nektar straffskuld.
– Ho stiller seg uforståande til siktinga. Utover det har eg ingen kommentar, seier kvinna sin forsvarer, Jurgita Zajanckauskaite.
Opererte på eiga hand
Kort tid etter overtakinga starta 39-åringen med innreiing og produksjon. Politiet meiner plantasjen hadde eit profesjonelt preg. Det er den største plantasjen som er avdekka i Vestland på fleire år.
– Det var dyrka på eit større areal av bustaden, i begge etasjar og i fleire rom. Det var gjort ein del endringar innvending for å legge til rette for dyrking, seier straffesaksansvarleg Askel Rødland.
Straumtilførselen gjekk utanfor straummålaren. Det var også montert betre ventilasjon enn i vanlege hus.
40-åringen har delvis tilstått.
– Det var gjort fullskala dyrking, og det var hausta og gjort klar for sal. Og det var sett i gang ein ny produksjon, seier Rødland.
39-åringen vedgår at han var i Noreg for å dyrke cannabis, men seier han opererte plantasjen på eiga hand.
– Han skulle ikkje omsetje det sjølv, men såg på dette som ein måte å kome ut av ein vanskeleg situasjon, seier forsvarer Synne Catrin Øren.
Politiet har førebels ikkje funne bindingar til bakmenn.
Svigerfar pågripen
Fire dagar før politiet slo til, vart også svigerfar til 39-åringen sikta. Dei meiner ein bil, utstyrsleveransar og betalingar knyter 58-åringen til plantasjen.
Mannen, som jobbar som tømrar på Austlandet, nektar straffskuld.
– Rollefordelingane er ein del av den totale pakken som vi framleis etterforskar. Det skal framleis gjerast avhøyr i saka, seier Rødland.
Det er uvisst om dei pågripne er tidlegare dømde.
Fleire liknande saker
Politiet har avdekka fleire plantasjar til no i år. I Trøndelag er 11 personar sikta i det politiet meiner er ein velorganisert produksjon. I Kristiansand er tre personar sikta etter funn av 200 plantar i ein bustad.
Politiet er kjende med sakene, men ser førebels inga openberr samanheng.
– Det er framleis ein del av etterforskinga vidare, seier Rødland.
Kvinne (62)
- Eigar av huset.
- Har ikkje erkjent straffskuld.
- Kom til Høyanger få dagar før razziaen, mellom anna for å plante blomar og ordne med bankpapir.
Mann (39)
- Pågripen i huset.
- Har erkjent at han var i Noreg for å dyrke cannabis.
- Son til huseigar, og svigersonen til 58-åringen.
Mann (58)
- Tobornsfar pågripen og varetektsfengsla på Austlandet.
- Har ikke erkjent straffskuld.
- Har i fleire år vore tilsett i eit norsk tømrarfirma.
- Svigerfar til mannen 39-åringen.
Mann (40)
- Har gjeve ei tilbakehalden tilståing etter konfrontasjonar.