Heltane under dekk

Vi er under dekk på MF Folgefonn, som er på veg over Langenuen. Her er det ein jamn dur frå motorane på andre sida av ei kraftig metalldør. Kjell Frode Magnussen passar på at dei oppfører seg som dei skal.

– Det er ein heil operasjon å starte opp om morgonen. Og så er det alltid noko å vedlikehalde. Det er ikkje berre å sitte og følge med på målarane, seier maskinisten.

Dieselelektrisk

MF Folgefonna er frå 1998 og skil seg frå andre ferjer i Hordaland. Den er dieselelektrisk. Det tyder at den går på straum, men at den har dieselmotorar som kan lage elektrisiteten. Det er dette systemet som vert nytta på ubåtar.

– Den skil seg litt frå dei tidlegare ferjene eg har jobba på, seier Magnussen.

– Det er meir å passe på med batteria. Men det fungerer greitt.

Overfart og kaiar: 4

Det er ikkje til å kome forbi at Langenuen er keisam. Det er kaiane på Jektevik og Hodnanes og. Men Nordhuglo er ei lita perle.

Fartøy: 6

Den karakteristiske MF Folgefonn er mellom dei nyaste ferjene til Norled. Det dieselektriske fartøyet frå 1998 har vore rundt på fleire samband i fylket, men ser ut til å ha funne ein heim no. Den er stille og behageleg, men det er ikkje så lett å føle seg heime i den smale salongen på eine sida.

Service og fasilitetar: 4

Det er berre trist med den nedlagde kafeteriaen om bord. Det såg litt ut som eit halvhjarta forsøk uansett. . Sjølvbetjeningskaffe som er ok. Toalett på kaiane på Stord og Tysnes. Triveleg butikk heilt på kaien på Nordhuglo.

Nostalgi og oppleving: 3

Det som er å gje poeng for her er på Nordhuglo. Her er det så vidt to små oppstillingsplassar. Dei som skal til Hodnanes må rygge om bord.

17 (av 40)