Ronny Iden er konstituert politimeister i Sogn og Fjordane (Arkiv NRK)
Politiet stadfestar at dei har fått melding frå Gades institutt som har undersøkt den drepne, men dei vil framleis halde tett om dødsårsaken. Fleire aviser skreiv onsdag at Slåtten vart kvelt, men politiet vil ikkje kommentere dette.
– Det vil fortløpande bli vurdert når vi vil gå ut med dette, seier konstituert politimeister Ronny Iden.
– Teknikarar leitar framleis etter spor på funnstaden. Når dei er ferdige, vil vi søke med hundar i eit større område. Vi vil også gjera nye søk med personell, sa Iden på pressekonferansen.
70 tips
Politiet har no fått hjelp frå tre nye etterforskarar frå Kripos, mellom anna ein fingeravtrykksekspert.
Politiet har i dag fått inn mange nye tips – totalt over 70, mellom anna har mange syklistar og bilistar meldt seg.
– Men vi veit ikkje om dette er nokon av dei vi har ettersøkt som vitne, seier lensmann Kjell Fonn.
Kjempearbeid
Politiet vil i kveld halde fram med rundspørring langs med ruta Slåtten følgde sundagsmorgonen. I alt vil 32 polititenestefolk banke på dører langs Angedalsvegen på leit etter nye spor og vitne.
– Vi har eit kjempearbeid å gjera og tida jobbar mot oss, seier lensmannen i Førde og Naustdal.
