Snuoperasjonen byrja med Hovland frå start

Det svingar fort i fotball, noko 2. bundesligaklubben Nürnberg og supporterane deira har merka.

Med Even Hovland skadd og på benken, kjempa klubben for å unngå nedrykk. Ni kampar seinare er dei formlaget – og fem poeng frå direkte opprykk – med Hovland på bana.

• Les også: Snart skadefri - kan bli bauta i tysk fotball!

– Det er kjekt med positiv tilbakemeldingar, men det er nok ikkje berre mi forteneste at vi har tatt poeng, seier den jordnære vaimingen.

– Tilfeldig

Tilfeldig eller ikkje, klubben er som natt og dag etter at Hovland debuterte frå start mot Ingolstadt i midten av november. Frå å berre ta åtte poeng på dei ni kampane i førevegen, har Nürnberg tatt 19 poeng på dei neste ni kampane. Hovland har starta alle.

• Les også: Hovland klar for Tyskland

26-åringen trur det er tilfeldig.

– Vi bytta også trenar då, og alle har jobba knallhardt på trening for å snu trenden. Det har vi heldigvis klart. Når spelargruppa får sjølvtilliten tilbake, så blir det fort poeng av det, seier han.

Trenaren trur på Hovland

René Weiler er den nye trenaren. Han har gitt Hovland tillit i alle kampar.

– Han er ein av faktorane, men eg vil ikkje peike på einskilde spelarar. Even er viktig og har no funne sin plass i både laget og byen, seier han.

• Les også: Even endeleg kvitt skaden - no gler han seg til meir speletid i sin tyske klubb

– Even har utvikla seg mykje og vakse seg meir og meir til ein leiartype, legg han til.

– Nøkkelelement

Florian Zenger, Alexander Endl og Stefan Helmer styrer supportersida Clubfans United – 1. FC Nuremberg. Supporterane hadde store forventingar då Hovland vart henta som klubben sin nye hjørnestein då Per Nilsson og Emanuel Pogatetz reiste etter nedrykket.

Zenger gir Hovland ein stor del av æra for at laget kjempar om opprykk.

• Les også: Trur Hovland blir ein stor suksess i Tyskland

– Hovland har starta alle kampane under René Weiler, og må difor reknast som eit nøkkelelement i snuoperasjonen, seier han.

Solid og stabilt

– Resultata snakkar for seg sjølve. Frå å sleppe inn 1,77 mål i snitt per kamp, er snittet 0,88 etter at vi byrja å bruke Hovland frå start. Det har både med Weilers meir defensive taktikk, men også med Hovland å gjere. Forsvaret er blitt mykje meir solid og er stabilt, seier Endl.

– Held han fram slik, held han definitivt nivået til Bundesliga, legg Helmer fram.

Tøffe kampar

Og det er Bundesliga klubben håpar å vere klar for 24. mai. Men allereie i to av dei neste tre kampane møter dei toppklubbar: Karlsruher på heimebane og Kaiserslautern på bortebane.

Det blir viktige kampar.

– Vi vil ha flest mogleg poeng, men må jobbe for dei i trening i kamp. Vi er inne i ein god flyt med to sigrar og har positiv giv i gruppa, seier Hovland og avsluttar:

– Jobbar du hardare og spring fortare enn motstandaren så vinn du kampane.