– Personen er ikkje identifisert, men det er ikkje grunn til å tru at det er nokon andre enn den personen som har vore sakna sidan søndag, sa operasjonsleiar i politiet Ole Tom Nord til NRK tidlegare i ettermiddag.
No stadfestar politiet at det er Skåre som er funnen død etter at det blei sett inn ein sonar i leitinga.
– Han blei identifisert av nær familie, seier Kai Henning Myklebust i Vest politidistrikt til NRK.
45 år gamle Harald André Skåre blei sist observert i Florø sentrum klokka 01.30 natt til søndag og meldt sakna søndag kveld.
Sidan 45-åringen blei meldt sakna søndag kveld, har store styrkar delteke i leitinga.
Søket har vore konsentrert ved Storevatnet som ligg like ved Florø sentrum. Årsaka er at Skåre sin mobiltelefon og førarkort blei funnet like ved vatnet.
Sonarsøk torsdag
Politiet byrja å søke med sonar i Storevatnet torsdag morgon på grunn av dårleg sikt i vatnet.
– Klokka 13.34 torsdag blei det gjort funn av ein død person i Storevatnet, seier Nord.
Ifølgje politiet er det for tidleg å seie om det ligg noko kriminelt bak funnet av den omkomne personen i vatnet.
Pårørande varsla
Pårørande til den sakna personen er varsla om funnet, ifølgje politiet.
Den omkomne personen blir no sendt til Gades institutt for obduksjon.