Har meldt Solhjell til Økokrim for brot på verdipapirhandellova

Det stadfestar aksjonæren Torbjørn Borge til Finansavisa.

Han hevdar Solhjell er skuldig i å ha brote reglane for tausheitsplikt og tilbørleg informasjonshandtering.

Bakgrunnen for saka er at Miljøverndepartementet delte ut kurssensitiv informasjon om Nordic Mining både til journalist Terje Ulvedal i Bergens Tidende og ordførar Håkon Myrvang i Naustdal kommune, midt i opningstida til børsen.

• LES OGSÅ: Seier nei til gruvedrift i Vevring
• LES OGSÅ: Skal diskutere gruve med minister

Aksjen stupte etter kunngjeringa

Då Bergens Tidende publiserte informasjonen på bt.no 13.mars, før Nordic Mining hadde nådd å sende børsmelding, og før den offisielle publiseringa på Miljøverndepartementet sine nettsider, så stupte Nordic Mining-aksja stygt på børsen.

I meldinga til Økokrim, som er datert 20. mars, skriv aksjonær Borge:

«Det er, slik undertegnede oppfatter verdipapirhandelloven, klart at informasjonen Solhjell ga til BT var å betrakte som kurspåvirkende informasjon, og dersfor ikke skulle blitt gitt.»

Selskapet Nordic Mining venta lenge på svar om dei kunne få lov til å drive gruve i Engebøfjellet i Vevring i Sogn og Fjordane. Etter halvanna år kom svaret frå Miljøverndepartementet 13. mars.

– Det er betydeleg kunnskapsmangel. Det er for stor uvisse om mogleg spreiing av massar. Difor seier vi til selskapet Nordic Mining og Naustdal kommeune at dei må skaffe meir informasjon. Når denne er på plass vil Miljøverndepartementet sjå på saka på ny, sa miljøvernminister Bård Vegar Solhjell til NRK.no då.

• LES OGSÅ: - Gruveutsetting i strid med lova
• LES OGSÅ: Meiner gruve-nei i Vevring bidreg til endå meir sentralisering

Meiner nokon har brote lova

Men kunngjeringa av dette vart leke til BT, to timar før departementet offentleggjorde informasjonen på sine nettsider.

– Slik dette er gjort, er det i mine auge nokon som har brote lova. Det er det same om det er statsråd eller ikkje, seier Borge til Finansavisen.

Han syner til at årsaka til at det berre er Solhjell i Miljøverndepartementet som er meld, er at det er han som er sitert i BT-saka, og at det er han som er ansvarleg for departementet.

• LES OGSÅ: Rysta over førebels nei til deponi i Førdefjorden
• LES OGSÅ: Nordic Mining overraska over nei - men Giske trur på «ja» til Engebø

Fekk ikkje vite at infoen var børssensitiv

Informasjonssjef Jon Berg i Miljøverndepartementet seier til Finansavisen at journalisten i BT ikkje fekk beskjed om at informasjonen han hadde fått var børssensitiv. Det fekk heller ikkje Naustdals-ordførar Håkon Myrvang.

– Vi såg ikkje at dette var naudsynt, seier Berg til avisa.

– Skjønte de sjølve at informasjonen var børssensitiv?

– Ja, seier Berg til Finansavisen.

På spørsmål om dei meiner det er tilbørleg handsaming av børssensitiv informasjon å sende den ut slik, svarar han:

– Vi gav sperrefrist. Det er vanleg å underrette kommunen, og så snart dei har motteke dokumentet, er det å rekne som offentleg, seier Berg til avisa.

Hevdar dei ikkje braut sperrefrist

Miljøverndepartementet hevdar til avisa at dei gav BT sperrefrist til klokka 14, men at avisa braut denne.

Det nektar avisa for.

– I vår kontakt med MD fekk vi beskjed om at saka kunne publiserast om lag klokka 14. Det var begrunna med at dei ville sikre seg at begge partane hadde fått informasjonen først. Det vart frå departementet si side ikkje sagt noko om børssensitiv informasjon, seier BTs nyheitsredaktør Tor Olav Mørseth til Finansavisen.

Han opplyser at saka vart publisert på BT.no klokka 13.57.

Tysdag ettermiddag sa Solhjell til NRK at han ikkje ønska å kommentere saka, sidan den er politimeld.