– Vi må undersøke samanhengen nærare og sjekke om vedkommande har alibi for ranet i går kveld, seier leiar Knut Ellertsen ved tjuveriavsnittet på Bergen sentrum politistasjon.
Han og resten av avsnittet har hendene fulle etter at tre kioskar har blitt rana på fire dagar i Bergen sentrum:
- Måndag 28. september: Ein mann iført raud hettegenser og med ein våpenliknande gjenstand i handa truga til seg eit ukjent pengebeløp frå Deli de Luca i Torggaten. Saka er ikkje oppklart.
- Natt til torsdag 01. oktober: Ein engelsktalande mann i svart hettegenser, tildekka ansikt og pistol rana Esso-stasjonen i Kanalveien. Han fekk med seg eit mindre pengebeløp før han stakk frå staden. Ein mann er mistenkt og har vore til avhøyr med politiet.
- Torsdag kveld 01. oktober: Ei ung kvinne bak disken på 7-eleven på Støletorget blir truga av ein ransmann med svart hettegenser. Mannen har med seg ei sprøyte og spring frå kiosken med eit mindre pengebeløp. Saka er ikkje oppklart.
Ein mistenkt
– Når det gjeld saka i Torggaten og saka i Kanalveien, så meiner vi at dei to ikkje har nokon samanheng, seier Ellertsen.
Politiet har hatt ein mistenkt inne til avhøyr etter pistolranet i Kanalveien. Han vart avhøyrt torsdag ettermiddag, og sleppt fri same kveld. Klokka 22.51 vart Støletorget rana av ein mann med sprøyte.
– Vi jobbar med video og vitneavhøyr for å komme litt nærmare om det er ein samanheng med dei opplysningane vi har so langt. Vi er komne eit stykke på veg, men det står att mykje arbeid. Vi jobbar på for fullt, seier Ellertsen.
– Full styrke
Videoar frå overvakingskamera er eit særs viktig spor for politiet, for dei kan sjekke klesdrakt, bevegelsar og tips i forkant og etterkant av ranet.
– Vi ønskjer at dei som har vore i nærleiken som kan ha sett noko, tek kontakt med oss. Det er betre at publikum tipsar ein gong for mykje enn ein gong for lite.
Ellertsen seier det er alvorleg at tre kioskar har opplevd ran med anten våpenliknande gjenstand eller sprøyte på så kort tid i Bergen.
– Av og til er det tilfeldigheitane som rår, slik me såg me brannane i sentrum tidlegare i år. Men det er klart at dette ikkje er bra og det er difor vi set inn full styrke på dette for å komma til botns i sakene, avsluttar Ellertsen.