– Den er svartelista som høg risiko. Når dei blir mange er det større fare for at det kan få negative konsekvensar på norsk natur, seier forskar, Eva Thorstad i Norsk institutt for naturforsking (NINA).
Russarane sette ut laksen ved Kolahalvøya på 50-talet og fisken har eksistert i Nord-Noreg i om lag 50 år. På dei åra har ikkje laksen gjort noko skade på det biologiske mangfaldet. Likevel er den uønskt.
- Les også:
Er ikkje sikre på konsekvensane
Fisken konkurrerer ikkje om maten med andre fiskar. Men ifølge Eva Thorstad i NINA, er ein redd det kan bli kamp om gyteplassane, sidan den gyter på dei same stadene som laks og aure. Rune Muladal, som har jobba med pukkellaksen i om lag 20 år trur ikkje det er problemet.
– Pukkellaksen gyter på eit tidlegare tidspunkt enn andre laks, så dei er ikkje i konkurranse, seier han.
Men når bestanden blir veldig stor, kan det bli problematisk, ifølge Muladal. Pukkellaksen gyter berre kvar andre år, men dei døyr rett etterpå.
– I Russland har ein dømer der laksen har fått soppdanningar som kan påverke annan fisk, når store bestandar døyr, seier han.
No kan det sjå ut som bestanden vi har i Noreg er blitt større.
Fleire har overlevd
Det er ikkje uvanleg å fange opp nokre få pukkellaksar om året. Den store mengda i år kom overraskande på forskarane i NINA. Over 200 laks er meld inn der dei siste ti dagane, og Thorstad trur det er enda fleire.
– Det kan tyde på at pukkellaksen har hatt gode forhold i havet dei siste åra, seier Eva Thorstad.
Muladal trur klimatiske forhold kan ha slått positivt ut for denne laksetypa, som opphavleg held til i Stillehavet.
– Det har vore varmare i sjøen, og fleire har greidd å overleve, seier dagleg leiar, Rune Muladal i Naturtenester i Nord.
– Vart veldig overraska
På fisketur i Naustdal, fekk 13 år gamle Johanna Nesbø den uvanlege fisken på kroken. Allereie då det nappa, skjønte ho at dette var noko spesielt.
– Han sprella veldig mykje, og eg skjønte dette ikkje var ein vanleg laks, seier ho.
Kusina hennar, Sina Nesbø, blei veldig overraska då ho skjønte kva dette var.
– Eg lurte lenge på kva det var, og så fekk eg vite at dette var ein innvandrar frå Russland, seier Nesbø.
Sjølv om fisken ikkje er ønska, er den rekna for å vere ein god matfisk utanfor gytinga. I Russland er rogna ei delikatesse, og jentene skal lage sushi av fangsten sin.