Denne veka vart det kjent at det tyske selskapet Verbundnetz gas (VNG) . Tidlegare har Statoil gjort eit funn fire mil lenger ute.
Både Statoil og VNG vurderer ilandføring av gass i Bremanger.
Optimistisk ordførar
I dag skal ordførarane bli informerte om funnet til VNG.
– Vi er optimistiske, for det er ein reell sjanse sidan dei har funne meir gass, seier ordførar i Bremanger Kåre Olav Svarstad.
I følgje kommunen er to alternativ aktuelle, eit anlegg for CO2 fangst eller eit såkalla LNG-anlegg som finst til dømes i Hammerfest.
To funn
Mellom tre og åtte milliardar kubikkmeter gass finst truleg på Agatfeltet berre 50 kilometer vest for Bremanger, samstundes har Statoil gjort eit funn på Peonfeltet 90 kilometer frå land.
I følgje leiaren for Bremanger hamn og næring Ann Irene Gulestøl er begge selskapa i ferd med å vurdere Smørhamn for ilandføring av gassen.
– Vi jobbar med begge selskapa for å sjå om vi kan nå fram med ilandføring til Smørhamn, seier ho.
Planar frå 80-talet
Ordførar Kåre Olav Svarstad er spent på utviklinga, og så langt vel han å vere forsiktig optimist. Det er ikkje første gong dei har drøymt om gass i Bremanger.
– På 80-talet utgreidde Saga Petroleum Smørhamn som ein mogleg plass for ilandføring. For at det skulle bli ein realitet, måtte oljeselskapa finne gass, seier han.
Smørhamn framfor Lutelandet
Sintef er i gang med eit studium for å sjå om Smørhamn kan verte hamn for eit oljeeventyr i Sogn og Fjordane.
Tidlegare har Lutelandet i Fjaler vore aktuelt i samband med ilandføring, men Gulestøl meiner fylket no må fokusere på Bremanger.
– No ser det ut til at Smørhamn kan segle opp, og vi reknar med at fylkeskomunnen kjem aktivt med på laget og dreg området fram, seier ho.