Regionredaktør Kai Aage Pedersen seier han er svært glad for å få Gilleshammer med på laget i den nye leiargruppa i region vest.
– Han har eit herleg engasjement, han er ein flott leiartype og han har stor tillit blant dei tilsette i NRK Sogn og Fjordane. Eg er trygg på at han vil gi eit stort bidrag for å sikra publikum eit endå betre tilbod enn dei får i dag, seier Pedersen.
Gilleshammer har vore tilsett i NRK Sogn og Fjordane sidan desember 2004, han er utdanna i internasjonal marknadsføring frå Høgskulen i Ålesund, han har studert ved Bangkok University i Thailand og arbeidd for lakseeksportøren Coast Seafood i Måløy.
I NRK Sogn og Fjordane har Gilleshammer vore journalist, vaktsjef og prosjektleiar for barne-tv. I to år har Gilleshammer også vore faglærar for NRK Nynorsk mediesenter.
Terje Gilleshammer seier han er stolt over å få leie NRK Sogn og Fjordane vidare:
– Eg kjenner eit sterkt ansvar for dette distriktskontoret og den viktige rolla vi har. Eg kjenner ein kjærleik for Sogn og Fjordane og folket her og ynskjer difor å vere med å utvikle NRK Sogn og Fjordane vidare.
Den nytilsette direktøren har også visjonane for det vidare arbeidet klare.
– Vi skal vere eit sterkt distriktskontor som leverer god journalistikk, program og historier. Og vi skal hjelpe til å løfte fram historier frå Distrikts-Noreg.
Kai Aage Pedersen seier Gilleshammer har vore ein pådrivar for å løfte fram historier frå Sogn og Fjordane inn i riksflatene til NRK.
– Frå første dag i NRK gjekk han laus på dei store oppgåvene. Han laga lengre TV-dokumentarar og saker til Dagsrevyen som fekk eit stort publikum. No får han ansvaret for å sikra god journalistikk frå Sogn og Fjordane, til eit lokalt og nasjonalt publikum, på dei plattformene publikum vil ha innhaldet på, seier Pedersen.
Terje Gilleshammer går inn i stillinga som distriktsredaktør 1. september.
