– Kultur er utan tvil den lettaste måten ein kan integrere seg i samfunnet på, seier Hamzeh Alsheiko.
Syraren flykta frå krigen i Syra til Norge for to år sidan. Han legg ikkje skjul på at det i byrjinga var vanskeleg å bli ein del av det norske samfunnet.
På Førdekonferansen i Florø tok syraren til orde for at kulturliv må bli ein større del av integreringspolitikken i Norge.
Fekk vener gjennom kulturen
Då Alsheiko flytta til Norge kjende han ingen nordmenn. Det var først då han byrja å gå fast på biblioteket i Bergen, at han knekte koden.
- Fekk du med deg denne?
På biblioteket møtte han folk han kunne dele interessene sine med - litteratur og teater.
– No er fleire av dei eg møtte på biblioteket blitt bestevenene mine. Vi har vore på hyttetur saman og gjort andre ting.
– Lang veg å gå
På Førdekonferansen, som er ein del av Førdefestivalen, var integrering årets hovudtema.
Terje Heggheim som er rådmann i Flora, meiner Florø-folket har ein lang veg å gå når det kjem til å hjelpe flyktningar å etablere seg i det norske samfunnet.
– Florøværingane har ein jobb å gjere. Vi må bli flinkare til å seie hei, og vi må bli flinkare til å invitere flyktningar til å bli med på aktivitetar.
Han fortel at kommunen har brukt store ressursar for å betre integreringa i kommunen.
– Vi har fått folk frå NTNU til å hjelpe oss med å sjå kva vi kan bli betre på. Resultata tek vi på alvor, og har kopla på fleire frivillige lag og organisasjonar i håp om å bli betre.
Ikkje framandfientleg
Marmoth Farmad, talsperson Likestilling integrering og mangfald (LIM) var også til stades på konferansen i Florø.
Han oppdrar nordmenn til la flyktningar ta del i tilbod som allereie finst i lokalsamfunnet.
– Ein treng ikkje spesielle kurs eller aktivitetar. Det er betre å la innvandrarane ta del i dei tilboda som allereie finst.
Også han meiner nordmenn kan bli flinkare til å involvere seg med nye landsmenn.
– Nordmenn er ikkje framandfientlege, men vi er introverte. Det kan vere greitt å berre ta kontakt, for dei fleste nordmenn er hyggelege, vi er berre litt introverte.
Hamzeh Alsheiko er samd.
– Flyktningane som kjem er ofte litt usikre på om det er griet å ta kontakt. Nordmenn er kanskje litt redde for å ta kontakt, men eg trur det hadde vore utruleg bra for intereringa om nordmenn hadde litt lågare terskel for å ta kontakt.