– Der kjem det ein lastebil. Det er trafikk her heile tida.
Det seier Narinder Singh Virdee, styreleiar i foreininga Bergen Singh Sabha Gurdwara.
Tungtrafikk køyrer stadig over brua ved ein bekk på Haukås i Åsane i Bergen.
Eit steinkast unna står Virdee ved einebustaden trussamfunnet kjøpte i 2018. Her ønskjer dei å etablere sitt gudshus, ein gurdwara.
Men det er ikkje berre å ta huset i bruk som forsamlingslokale. Sånt må ein søke om bruksendring for.
Utfordringa er at det er eit mellombels forbod mot tiltak og bygging i området. Dette for å verne om dei utryddingstruga elvemuslingane som lever i vassdraget like ved.
Har søkt unntak – har førebels fått nei
For å få bruksendring frå einebustad til forsamlingslokale, har sikhane søkt kommunen om unntak frå forbodet. På sikt ønskjer dei også å få seg større plass til parkering.
– Det er ikkje så mange bilar vi har, berre rundt 20-25, og det er stort sett elbilar. Gudstenesta skal vere ein gong i månaden, så det er ikkje så mykje trafikk, forsikrar Virdee.
Men både byrådet, Statens vegvesen og fagetatane seier nei til noko unntak. Kommunen har i fleire år jobba for å verne om muslingane.
– Det er utruleg viktig for byrådet å vareta det biologiske mangfaldet og elvemuslingane i vassdraget, seier Thor Haakon Bakke (MDG), byråd for miljø og byutvikling.
– Noreg har eit internasjonalt ansvar
Bakke meiner at fleire partiklar frå vegen og ned i vassdraget kan gjere situasjonen verre for ein allereie kritisk bestand.
– Noreg har eit internasjonalt ansvar for å ta vare på denne arten. Ein fjerdedel av elvemuslingane i Europa er i dag i Noreg. Dette er ein fantastisk skapning som kan filtrere 50 liter vatn i døgnet, seier han.
– Men kva med all tungtrafikken som køyrer her frå før? Vil det utgjere så mykje meir belastning om sikhane kjem ein gong i månaden?
– All ekstra belastning vil jo vere meir belastning for muslingsbestanden. Ein kan meine mykje om at det allereie er aktivitet i området, men byrådet er tydelege på eit nei.
Høgre og Raudt til unnsetning
Framleis kan det bli ein lukkeleg slutt for både sikhar og elvemuslingar.
Torsdag skal saka opp i utval for miljø og byutvikling i bystyret i Bergen.
Sosialistisk Venstreparti har bestemt seg for å vere samd med byrådet. Ap er førebels usikker, mens Høgre, Raudt og dei to uavhengige vil legge fram eit forslag om å gjere unntak for sikhane.
Dei stiller eitt vilkår for bruksendringa: at det ikkje blir etablert parkeringsplassar på eigedomen.
I dag har sikhane ein avtale om å parkere på eigedomen til byggvarekjeda Montér Åsane. For at vilkåret skal bli oppfylt må dei skaffe ein skriftleg avtale om dette, krev partia.
– På den måten kan sikhane bruke lokalet utan at det vil gå utover elvemuslingane, seier Charlotte Spurkeland (H).