– Brannen er sløkt og vi har kontroll, seier Jan Gunnar Holvik ved Alarmsentralen i Florø.
Brannmannskapa fekk raskt kontroll på brannen, som starta like ved parkeringsplassen ved Norheitunellen.
Brannen vart meld like før klokka 20.30.
Ein liten brann denne gongen
– Vi fekk melding om at det var ein skog og lyngbrann på riksveg 609 mot Askvoll, seier brannsjef i Førde, Bernhard Øberg.
– Vi tok den på alvor og køyrde ut vaktlaget.
For brannsjefen seier at dei er ekstra på vakt, no når det er så fint vêr . Det er tørt i terrenget og ting kan skje raskt.
Det brann på eit område på fire gonger fire meter.
– Når vi kom fram såg vi at det heldigvis ikkje var store greiene, seier Øberg.
No oppfordrar brannsjefen folk om å vere ekstra forsiktige og hjelpsame.
Brannsjefen: – Må vere forsiktige!
– For det første er det svært viktig å melde frå. Om publikum ser noko som kan utvikle seg må dei melde frå. Så får vi heller rykkje ut ein gong for mykje.
– Har de ein teori om kva som skjedde her?
– Nei, vi har ikkje funne noko som helst her i området, så det kan vere eit glasbrot eller ein sigarettsneip som har ført til brannen.
Brannen skjedde nær Riksveg 609 mot Askvoll.
– Folk må vere svært forsiktige no for tida. Om du røyker, ikkje kast sneipen i naturen, seier Øberg.
– Dei må også vere forsiktige med eingongsgrillar.