Gler seg over historiske lakseprisar

I dag sel nemleg oppdrettarane laksen for over 50 kroner kiloet.

Elin Tveit Sveen i Marøy Havbruk på Svanøy i Flora kommune gler seg over historisk god pris.

– Vi har rekordprisar som vi ikkje kan hugse sist vi opplevde, seier ho til NRK.no.

– Heilt fantastisk

Til no i år er det eksportert laks for vel 31 milliard kroner, det viser tal frå Norsk sjømatråd. Også mengda laks som blir eksportert er rekordstor.

Ola Braanaas i Firda Sjøfarmer starta med oppdrett av laks i 1994, og på dei snart 20 åra han har vore i bransjen kan han ikkje hugse å ha fått over 50 kroner kiloet.

– Eg synest dette er heilt fantastisk. Det er veldig bra at vi har norske bedrifter og ei næring i Norge som gjer det veldig bra, og som ikkje er oljerelatert, seier han.

Stor etterspurnad

Forklaringa på dei gode prisane er stor etterspurnad etter norsk laks.

– Dei gode prisane skuldast for det meste ubalanse i marknaden. Det er mykje større etterspurnad enn det vi klarer levere.

– Prisane skuldast også at vi har ei svekka krone som gjer at prisane i eksportmarknaden trekkjer opp, seier Braanaas.

• LES OGSÅ: Rekordstor eksport av sjømat
• LES OGSÅ: Vil utrede ny oppdrettsavgift
• LES OGSÅ: Torsken selger dårligere enn før

(Artikkelen held fram under)

Vil gjerne produsere meir

Tveit Sveen på Svanøy seier dei veldig gjerne skulle ha produsert meir. Førebels er taket for produksjonen nådd.

– Skal vi kunne vekse meir no, må styresmaktene gje oss lov til å produsere meir.

– Marknaden der ute skrik etter meir laks, og underdekninga i marknaden er forklaringa på dei høge prisane. Hadde vi fått lov produsere meir laks i Norge, hadde det ikkje vore problem å selje den.

Braanaas veit at mange misunner næringa dei gode tidene.

– Misunninga er ofte sterkare enn kjønnsdrifta, men det viktigaste må vere å gle seg over norske bedrifter som gjer det godt, seier han.