– Leitt både for Høgre og Unge Høgre

– Det er leitt at slike situasjonar oppstår. Det er ikkje heldig for omdømet til partiet, men me er opptekne av å handtera situasjonen på ein skikkeleg måte.

Slik kommenterer generalsekretær Erlend Svardal Bøe i Unge Høgre den tilspissa konflikten mellom leiar i Sogn og Fjordane Unge Høgre, Amanda Solvåg, og partiet sin fylkessekretær Ingvar Torsvik Myrvollen.

Solvåg meiner at Myrvollen dei siste to åra har mobba henne og motarbeidd henne og Unge Høgre.

Myrvollen vil ikkje la seg intervjua om saka, men skriv i ein epost til NRK at han har ei heilt anna oppfatning av dei påståtte forholda, og at han i eit møte med Solvåg skal ha beklaga to uttaler.

• Les òg: «Eg har over tid følt meg trakassert og mobba av fylkessekretær Ingvar T. Myrvollen»

– Eg vil ikkje gå inn på påstandane, men tykkjer situasjonen er lei både for Høgre og Unge Høgre, seier Svardal Bøe, som kjem frå Florø.

Tok ikkje kontakt

Som generalsekretær skal Svardal Bøe hjelpa og støtta Unge Høgre sine fylkesleiarar. Svardal Bøe blei orientert om konflikten då Solvåg i fjor haust tok saka opp med leiinga i Sogn og Fjordane Høgre. I to brev gjorde ungdomspartileiaren i detalj greie for ei rekkje forhold som ho omtalar som ei "mobbesak".

Svardal Bøe tok ikkje kontakt med Solvåg før han tidlegare denne veka fekk vita at saka kom i media.

– Me fekk før jul signal om at saka ville bli løyst lokalt. Då såg ikkje me det som naudsynt å gripa inn, fordi kan dei løysa eit problem lokalt, er det beste, seier Svardal Bøe.

Han presiserer at Unge Høgre – frå dei fekk vita om saka – har hatt dialog med Solvåg gjennom ein kontaktperson i sentralstyret:

– Etter dialogmøtet mellom partane (Solvåg og Myrvollen, journ.merk.) i desember i fjor, høyrde me ikkje noko anna enn at partane skulle sjå saka som ferdig.

Innblanda i strid i 2014

På årsmøtet til Sogn og Fjordane Unge Høgre i 2014 var Svardal Bøe involvert i ein episode som Amanda Solvåg hevdar var med på å løysa ut konflikten mellom henne og fylkessekretær Myrvollen.

Solvåg hevdar at ho og Myrvollen var usamde om kven som skulle sendast som Sogn og Fjordane sitt delegat til Unge Høgre sitt landsmøte. Erlend Svardal Bøe, som på dette tidspunktet verken var generalsekretær eller sentralstyremedlem, var til stades på årsmøtet sjølv om han ikkje var medlem i fylkeslaget. Han heldt støttetale for den eine av dei to aktuelle kandidatane, den kandidaten som Solvåg hevdar Myrvollen støtta.

Avviser konflikt

På eit tidspunkt blei møtet foreslått lukka, slik at Svardal Bøe og andre ikkje-medlemmer skulle bli avskorne frå å påverka utfallet.

Då skal Myrvollen ha reist seg frå referentplassen og skulda Solvåg for å driva manipulering av møtelyden, men Myrvollen skal ikkje har gjort haldninga si i delegatstriden kjent for forsamlinga.

Skuldingane om manipulering er éin av uttalene som Myrvollen har beklaga.

– Har du vore i konflikt med Amanda Solvåg etter denne episoden, Svardal Bøe?

– Nei.

– Det at du ikkje kontakta Solvåg etter at du fekk vita om den påståtte mobbesaka – har det noko å gjera med det som skjedde i 2014 og ditt forhold til Solvåg?

– Nei. Det har ingenting med den saka å gjera.

– Kan skada rekruttering

Leiar Jacob Bredesen i Sogn og Fjordane Unge Venstre reagerte skarpt då denne saka blei kjent og tok sjølv kontakt med NRK:

– Dette er alvorleg. Det er eit problem når ho kjenner seg mobba og motarbeidd. Det er viktig at unge politikarar blir tekne vare på og ikkje kjenner motarbeidd.

– Men fylkessekretær Myrvollen har ei heilt anna oppfatning av desse påståtte forholda. Korleis kan du vera sikker på at Solvåg har grunnlag for å seia at ho er mobba?

– Eg skal ikkje blanda meg inn i interne forhold i Høgre, men dette handlar om at ungdom må kjenna seg inkludert i partiet uansett, seier Bredesen.

Unge Venstre-leiaren fryktar at ungdommar blir redde for å engasjera seg og ta på seg politiske verv på grunn av denne saka:

– Eg håpar alle parti syter for å ha god dialog med ungdomspartia sine.