Kritikken kom etter at Eriksen fortalde at han hadde vore med fylkesleiarane i Venstre og KrF i møte med sentrale politikarar for dei to partia.
Representantar frå Høgre, Senterpartiet og Frp hissa seg opp og meinte rådmannen brukte informasjon frå møtet som argumentasjon i saka om standarden på fylkesveg 60 mellom Olden og Innvik.
- Les meir her:
Mellom anna vart det sagt at sentrale politikarar følgjer med korleis fylkespolitikarane prioriterer med knappe rammer.
Høyr innlegget til fylkesrådmannen:
– Går langt over streken
Reaksjonane lét ikkje vente på seg:
– Når fylkesrådmannen har ordet skal det ikkje vere grunn til å ta replikk. Då skal det kome saksopplysningar. Eg meiner fylkesrådmannen går over streken når han går inn på ein del politiske vurderingar, sa Arnstein Menes (Sp).
– Dette er oppsiktsvekkande. Dei politiske prioriteringane vi skal gjere i Sogn og Fjordane, er det vi som skal gjere, og vi som har ansvar for, sa Noralv Distad (H).
Også Frank Willy Djuvik raste frå seg etter innlegget frå fylkesrådmannen.
– Eg meiner han går langt, langt over streken. Det er ikkje ein gong i nærleiken av streken. Dette skal ikkje skje. Å delta på møtet er greitt, men å bruke informasjonen på denne måten for å oppnå eit resultat er ikkje greitt, sa Djuvik.
Ville berre dele fakta
Fylkesordførar Åshild Kjelsnes (Ap) tok også til ordet.
– Det er viktig at det kjem fram faktaopplysningar som kan ha innverknader for fylket si framtid, sa ho.
Eriksen sa etterpå at han berre ønskte å komme med ei opplysning,
– Eg ønskjer ikkje å ta del i den politiske debatten i fylkestinget, i alle fall ikkje på ein slik måte som det vert sagt her at eg bør passe meg for. Det blir lagt merke til kva vi gjer, og då synest eg det er greitt at fylkestinget får beskjed om det, fortalde Eriksen.
Etter ein lang debatt gjekk fylkestinget, med berre ei stemme overvekt, inn for å ruste opp siste biten av fylkesveg 60 Olden-Innvik med beste standard, altså 7,5 meters vegbreidde.
- Les også: