Statssekretær Kristin Holm Jensen frå Kommunal- og moderniseringsdepartementet stadfesta på eit allmøte for fylkesmennene i Sogn og Fjordane og Hordaland fredag at fylkesmannen skal ha hovudsetet på Leikanger.
Ho peiker på to hovudgrunnar til at lokalasjonen vert Leikanger:
- Regjeringa har som mål å bygga opp regionale senter over heile landet ved statelege etatar. Leikanger er eit kompetansesenter.
- Fylkeskommunane sjølv har avtalt at dei ville ha administrasjonen til Fylkesmannen i Bergen og hovudembetet på Leikanger. Det skal respekterast.
Det er framleis ikkje tatt ei endeleg avgjerd om fordeling av funksjonar og oppgåver som vert lagt til dei forskjellige plassane.
- Les også:
Intensjonsavtalen
Då intensjonsavtalen for Vestlandsregionen vart signert av dei to fylkesordførarane i Sogn og Fjordane og Hordaland, Jenny Følling (Sp) og Pål Kårbø (KrF), 17. januar i år, stod det at Fylkesmannen skulle bli lagt til Leikanger.
Alt før intensjonsavtalen vart signert, sende fylkesmann i Hordaland, Lars Sponheim melding til Kommunal- og moderniseringsminister Jan Tore Sanner, om at Fylkesmannen for ein Vestlandsregion burde ha sete i Bergen.
Ap vil snu
Noverande fylkesmann, Anne Karin Hamre, vart 22. mai konstituert som til mellombels fylkesmann for Sogn og Fjordane, fram til 1. januar, 2019. Fylkesmannsembeta i Hordaland og Sogn og Fjordane blir slått saman frå 1. januar 2019.
I slutten av mai varsla Arbeidarpartiet at dei kom til å snu om fylkessamanslåing, nettopp på grunn av at lovnaden om at Fylkesmannen til Sogn og Fjordane ikkje var innfridd.
– Viktig siger
– Eg tenker at nyheita i dag er ein viktig siger for oss som har jobba med intensjonsplanen for det nye vestlandsfylket, seier fylkesordførar i Sogn og Fjordane, Jenny Følling.
Ho meiner det er bra og naturleg at fylkesmannen skal ha hovudkontoret sitt i Sogn og Fjordane, sjølv om Hordaland og Bergen har langt fleire innbyggjarar.
– Regjeringa er opptatt av at vi skal ha ein balanse i dei nye fylka. Sogn og Fjordane og Hordaland har ønska denne ordninga, og det støtta vi. Vi ønsker å spreie makt, vi ønsker å bygge opp om utviklinga i distriktsfylka og då er det naturleg å legga til rette for det ved å legga fylkesmannen til Leikanger, seier kommunalminister Jan Tore Sanne (H).