Brannen i bustadhuset i Muristranda i Olden er no sløkt, melder politiet 19.50.
Det var fire personar som hadde tilhald i huset. Ingen av dei er skadde og dei får no oppfølging og hjelp til husly.
Det kom inn melding klokka 17.43 om at eit bustadhus på Muristranda i Olden i Stryn kommune sto i full fyr.
Brannmannskap kom raskt fram til staden og starta sløkkinga.
Dei fekk raskt kontroll på brannen slik at det ikkje var fare for spreiing til nærliggande bustadar.
– Det var folk i huset då brannen starta og det var dei som melde frå om brannen, seier Tom Johannessen i Vest politidistrikt.
Politiet har ikkje fått melding om personskadar.
Heller ikkje Jostein Steinsland-Hauge i 110-Vest har fått melding om at nokon skal ha vore i huset.
Rune Nygård er dagleg leiar ved Olden Fjordhotel. Han var augevitne til huset som brann i byggefeltet bak fjordhotellet.
– Det var ein kraftig brann som såg eksplosiv ut. Brannmannskapet jobba for fullt på staden, seier Nygård.
Håvard Tonning var også augevitne. Han sa til NRK klokka 18:30 at dei kraftige flammane hadde roa seg.
Vil ettersløkke i lang tid
Alarmsentralen seier at brannen ikkje er sløkt enno, og at brannmannskap framleis jobbar på staden.
Det er ingen av husa i området som er evakuerte.
– Er huset totalskadd?
– Det torer eg ikkje svare på, men det har brent kraftig og er dunka kraftig i vatn.
Brannmannskap frå Utvik, Olden og Stryn er på staden. Klokka 18.45 opplyser 100- sentralen at huset er totalskadd og at det blir sløkking og ettersløkking i langt tid framover.
Jostein Steinsland-Hauge i 110-Vest opplyser til NRK 19.30 at brannen framleis ikkje er sløkt.
Kva som er årsaka til brannen er ukjent.