Mange fryktar det kan føre til at folk tek fleire sjansar og at det igjen fort kan føre til stygge ulukker.
- Det er veldig synd at politiet ikkje har eigne båtar, vi treng eit oppsyn til sjøs. Det skjer stadig ulukker og det er viktig at det finst folk som kan rykke ut dersom det skjer noko, seier Lars Kristian Hellesen i Florø.
- Folk tek fleire sjansar
Saman med kameraten Anders Solheim Book vert Hellesen stadig lokka av leiken på bølgjene utanfor Florø i Sogn og Fjordane.
Fram til i haust hadde politiet i kystbyen ein eigen politibåt, men no er den selt og det vert ikkje synleg politi til sjøs i fjordfylket.
Kameratane fryktar lovlause tilstandar og er svært kritiske.
- Det kan vere at folk tek fleire sjansar og til dømes køyrer med promille. Utan kontrollar kan folk som ikkje burde vere på sjøen få fritt spelerom og mange bryr seg gjerne ikkje med å ta båtførarbeviset slik det er krav om, seier Solheim Book til NRK.no.
- LES OGSÅ:
(Artikkelen held fram under biletet)
Store delar av kysten utan politi til sjøs
Det er ikkje berre i Sogn og Fjordane at politiet har måtte kvitte seg med politibåten. Dårleg økonomi har ført til at fleire politibåtar har forsvunne langs kysten.
- LES OGSÅ:
I dag er det ingen politibåt mellom Bergen og Trondheim. Samtidig har også Kystvakta redusert beredskapen langs kysten av Sør-Norge frå fem til fire skip.
- Eg veit om mange som køyrer båt utan båtførarbevis, og utan politiet til å kontrollere dei kan dei jo berre fortsetje, seier Hellesen.
Også Redningsselskapet meiner det er ille at det ikkje finst ein einaste politibåt langs kysten av fleire fylker på Vestlandet.
- LES OGSÅ:
Mistenkjer promille etter båtulukke
Seinast tysdag kveld skjedde det ei alvorleg båtulukke i Florø. Båten til to seksten år gamle gutar vart knust då ein mann i 40-åra køyrde over dei med sin eigen båt.
Mannen er mistenkt for promillekøyring og ein av gutane ligg framleis på intensivavdeling.
- LES OGSÅ:
(Artikkelen held fram under biletet)
- Det er svært frustrerande
For politimeisteren i Sogn og Fjordane er situasjonen utan eigen politibåt svært frustrerande.
- Eg skulle gjerne sett at vi kunne hatt kontrollar på sjøen i større grad. Men dette er eit ressursspørsmål, og vi har ikkje ressursane tilgjengeleg, seier politimeister Johan Brekke til NRK.no.
Han seier samtidig at politiet vil vurdere å ha enkelte kontrollar langs kysten av Sogn og Fjordane i sommar.
- Vi vurderer om vi skal leige inn båtteneste med Hordaland politidistrikt enkelte dagar, seier Brekke.
Politimeisteren presiserer samtidig at vakt og beredskap er sikra ved at politiet har avtalar med private båtselskap. Dette skal sikre at politiet kjem seg til og frå dersom noko skjer.
- LES OGSÅ:
- Det vert meiningslaust
Dei to båtglade ungdomane Anders Solheim Book og Lars Kristian Hellesen håpar på si side at noko vert gjort for å betre politiet sine kontrollar.
Slik politiet til tider held på i dag vert det meiningslaust, meiner dei to.
- Etter at dei selte båten sin har eg blitt vinka i land av politiet som står på land og blinkar med lysa på politibilen sin. Dersom det hadde vore ein person som køyrer med promille hadde vedkommande lett kunne køyrt der i frå og laga endå større problem, seier Hellesen oppgitt.