– Eg er litt uroa. Eg trur det er ein person som ikkje forstår konsekvensane av dette. No har vi vore heldige og klart å sløkkje brannane tidleg, men det skal berre litt meir vind til, så ryk det meste av denne skogen med, seier Bjærke.
Kaupangerskogen i Sogndal kommune er ein av dei største skogane på Vestlandet, og det er store verdiar i furuskogen som fleire stader ligg tett inntil busetnad.
– Eg har vore i dette yrket i mange år, og dette er veldig spesielt, seier innsatsleiar i Sogn brann- og redning, Elmer Sjøvoll.
– Neste gong kan det gå mykje verre
Etter den første brannen fann skogeigar Anders Bjærke ei fyrstikk i vegkanten like ved. Då trudde han at det var tilfeldig, og at nokon hadde vore uforsiktige. Etter fem brannar til er skogeigaren overtydd om at brannane er påsette.
I ettermiddag var Bjærke ein av dei første som kom til brannområdet ved Amla. Då hadde to andre allereie tømt pulverapparata sine.
– Det brann mange plassar. Men dei hadde klart å stogge ganske mykje, og då eg kom til med eitt apparat til, klarte vi å få sløkt det meste av flammane.
Også brannen ved Dalaker vart raskt sløkt. Bjærke fryktar dei ikkje er så heldige neste gong.
– Neste gong kan det gå ekstremt mykje verre.
- Les også:
- Les også:
– Blir nervøs
Helge Ruud er bonde på Dalaker. Han kom til med gyllevogna si med vatn då det byrja brenne i skogen i området i kveld. Etter seks skogbrannar er han uroa.
– Det er litt ekkelt. Ein blir nervøs av dette.
Sjøvoll i brannvesenet håpar politiet raskast mogleg finn ut kva som har skjedd.
– Det har litt med innbyggjarane å gjere, som sikkert føler at det er veldig ubehageleg med så mange brannar på kort tid. Dette må vi få sett ein stoppar for, seier Sjøvoll.
– Eg forventar at politiet gjer noko no, seier skogeigar Bjærke.
– Ingen mistenkte
Politibetjent Sondre Lillebostad var på brannstadane onsdag kveld. Han vedgår at det er spesielt med så mange branntilløp i det same området.
– Verstefallteorien er alltid at det er påtent, beste er at det har skjedd av seg sjølv. Vi må etterforske både best og verst, og det imellom.
Politiet har gjort avhøyr av vitne, gjort undersøkingar på brannstadane og bede publikum om tips. Så langt er dei ikkje nærare noko svar på årsaka til brannane.
– Vi prøvar å sjekke ut dei tipsa vi får, men vi har ingenting som gjer at vi har nokon mistenkte.