Gjennom åtte år og ni sesongar har Frode Søreide reist land og strand rundt for å la meklarar tippa husprisar. Men no er det slutt.
– Det er ein form for kjærleikssorg no. Det har vore ei stor oppleving å få reise rundt i Noreg og i utlandet for å tippe bustadprisar, så det blir eit lite tomrom.
Blir ikkje sett nok
TV-programmet har fylt kvardagen hans i så mange år at det har blitt ein viktig del av livet.
– Det har vore mykje reising, og til dels har det vore det livet har handla om, så eg kjenner litt på det, seier Søreide.
Redaktør for Dokumentar og samfunn i NRK, Frank Gander, fortel til Medier24 at programmet leggast ned fordi det ikkje blir sett nok i NRK si strøymeteneste.
– «Solgt!» har samla folk i hopetal framfor TV-skjermen, både i førstegongsutsendingar og i reprisar, men ikkje fungert like godt i NRK TV, seier Gander.
– Det er omlegging og nye tider. Folk ser mindre på TV no enn tidlegare og folk streamer sin eigen TV-kveld. Det er nok litt i den utviklinga at ein har kome til denne konklusjonen, seier Søreide.
Nok reprisestoff
I løpet av dei ni sesongane har Frode Søreide innført nokre nye ord i ordforrådet sitt – og kanskje også hos andre.
– Etestove har jo blitt litt meg. Det datt no berre ut og var litt tilfeldig, men sidan har det festa seg, seier han.
Men no må Søreide finne seg noko anna å gjere på. I mellomtida kan det godt hende han dukkar opp på skjermen med «Solgt!» likevel – men då i reprise.
– Det er ikkje sikkert folk er kvitt meg endå.