– Heimen blir i framtida den viktigaste behandlingsstaden for fleire pasientgrupper, seier utviklingsdirektør Anne Kristin Kleiven i Helse Førde.
Dette er noko som kan gjere kvardagen lettare for mange kronikarar, som tidlegare har vore nøydde til å reise over lange avstandar for kontrollar.
– No har vi utstyr som kan måle korleis blodsukkeret svingar hjå pasientar med diabetes, og vi kan følge hjarteslaga til hjartepasientane, utan at dei treng å kome til sjukehus, seier Kleiven.
Kols-pasientar er ei anna gruppe der ein i dag kan gjere meir digitale målingar. Tidlegare fekk pasientane ein såkalla Kols-koffert.
– Med den kunne pasientane snakke med legen via ein skjerm. No er dette blitt mykje enklare og vi kan gjere digitale målingar av pusten til pasienten medan dei er heime i si eiga stove, seier Kleiven.
E-konsultasjon
Alt i dag kan pasientane mellom anna lese epikrise og endre timane sine på helsenorge.no. I framtida vil moglegheitene bli utvida til å utveksle informasjon og samtale via nettet.
FRAMTIDA: Anne Kristin Kleiven er utviklingsdirektør i Helse Førde.
Foto: Odd Helge Brugrand / NRK– Eg trur nok at vi forenkle mykje slik at i treng å reise så ofte på kontrollar. Vi kan bruke video og snakka via skjerm og mobiltelefonen har vi jo med oss over alt, seier Kleiven.
For å sikre at pasientopplysningar ikkje kjem på avvegar skal kommunikasjonen skje via innlogging på nettsida helsenorge.no.
– Når det gjeld å få stilt diagnosane så gjeld det å ha ein god relasjon mellom pasient og lege og ha godt utstyr, dersom det er noko ein skal sjå, seier Kleiven.
Gode erfaringar
I fleire år har det vore utplassert utstyr for telemedisin i kommunane slik at pasientane og fastlegen kunne få ei vurdering av ein spesialist, utan å måtte oppsøke eit sjukehus.
– Det har vore brukt innanfor hudsjukdommar, og er noko vi har hatt gode erfaringar med, seier Kleiven.
I 2017 har det vore jobba med fleire prosjekt for å utvikle tenestene som helseføretaket skal tilby pasientane i fylket i framtida. Blant anna har dei jobba med å få til ei tolketeneste via skjerm.
– Det gjer at vi slepp at tolken må kome hit, det at det og blir lettare å sjå kroppsspråk og det som vert sagt verbalt ein samanheng, seier Kleiven.
