Hopp til innhold

Fotballprofilen og familien måtte evakuerast etter jordskjelvet

Då heile bustadblokka rista, sprang Marthe Hamre Owesen for livet med dottera Lilly (1,5) i armane. Samstundes var sambuar Jonas Svensson i Istanbul for å spele fotballkamp.

Fotballprofilen og familien måtte evakuerast etter jordskjelvet

TØFT: Marthe Hamre Owesen og sambuaren Jonas Svensson har budd saman i Tyrkia i halvanna år og trivst godt. Måndag enda idyllen då eit kraftig jordskjelv råka landet svært hardt.

Foto: Privat

Vi er smerteleg klare over kor heldige vi er, seier Marthe Hamre Owesen (31) frå Selje i Nordfjord.

Owesen, sambuaren Jonas Svensson (29) og dottera Lilly (1,5) overlevde jordskjelvet som råka Tyrkia og Syria natt til måndag.

Fotballklubben til Svensson evakuerte spelarane med familie til Antalya.

Så langt er meir enn 5000 stadfesta omkomne etter skjelvet, men WHO fryktar at så mange som 20.000 kan ha mista livet.

Sprang for livet med dottera i armane

Klokka var litt over 04.00 natt til måndag då småbarnsmora bråvakna heime i den 15 etasjer høge blokka i den tyrkiske storbyen Adana.

bustadblokka som Marthe Hamre Owesen og sambuaren Jonas Svensson bur i i Tyrkia.

Familien bur i eit bustadfelt med fire høgblokker i den tyrkiske byen Adana. Her har dei blitt godt kjente med folk frå inn- og utland, og trivst svært godt.

Foto: Marthe Hamre Owesen

Heile bygget rista.

I naborommet låg Lilly på halvanna år og sov tungt. Ho ante ingenting om jordskjelvet med ein styrke på 7,8, som er det sterkaste skjelvet sidan 1939.

– Eg handla på instinkt og sprang alt eg kunne for å hente henne. Om eg ikkje kjem meg ut av bygget, så rasar alt i hovudet på meg, tenkte eg.

Sambuaren, den tidlegare landslagsspelaren Jonas Svensson, var ikkje heime.

Han og fotballaget Adana Demirspor var i Istanbul og merka ingenting til dramatikken.

Les også Moske ødelagt av jordskjelv tre ganger på drøyt hundre år

Et bolighus har rast fullstendig sammen i Diyarbakir i Tyrkia.

I Adana sprang Owesen ut på gata med dottera i armane. Her samla også andre forskremte born og vaksne seg, medan regnet og vinden piska dei i ansiktet.

Nokon sprang inn i parkeringskjellaren i den eine blokka og fekk henta ut ein bil slik at dei kunne kome seg vekk, fortel småbarnsmora.

– Forferdeleg å høyre om alle som har døydd

Owesen og dei andre fotballfamiliane søkte tilflukt på treningsanlegget til fotballklubben, som berre er éin etasje høgt.

Seinare kom det eit etterskjelv som nesten var like sterkt som det første.

– Eg har aldri opplevd noko liknande før. Det er så forferdeleg å høyre om alle som har døydd, seier Owesen.

Ho har fleire kjenningar som saknar familie og venner i ruinane.

Fra jordskjelvrammede Adana , Tyrkia

Adana er blant dei hardast råka stadane etter jordskjelvet.

Foto: Åse Marit Befring / NRK

Det er svært tøft å høyre om alle som truleg er omkomne, fortel ho.

Adana er blant områda i Tyrkia som er hardast råka av skjelvet. Episenteret ligg eit par timars køyring unna Adana.

Kampen som Svensson skulle spele mot Ümraniyespor vart utsett. I går tok den vesle familien fly til Antalya. Det same gjorde dei andre på fotballaget og familiane deira.

Før Owesen og Svensson reiste, tok dei sjansen på å hente ut pass og identitetspapir frå bustadblokka dei bur i.

Flyturen blei svært tøff. Dei som hadde opplevd jordskjelvet sat og grein, fortel Owesen.

– Det var så kraftig vind, og vi fekk enorme «flashback» frå skjelvet, fortel småbarnsmora.

Ho og familien ønskte først å reise heim til Noreg, men no blir dei truleg verande likevel.

Jonas Svensson med dottera Lilly

Den tidlegare Rosenborg-spelaren og landslagsspelaren Jonas Svensson spelar no for den tyrkiske toppfotballklubben Adana Demirspor. Han og familien har budd i Adana i halvanna år.

Foto: privat

– Vi treng å jobbe oss gjennom det som har skjedd saman med andre som har opplevd det same som oss, fortel nordfjordingen over telefon frå Antalya.

Gater fulle av øydelagde hus

Kor lenge dei blir verande i Antalya eller vegen vidare, veit dei ingenting om.

Heim til Adana kan dei ikkje reise. Bustadblokka deira er ikkje trygg. Det same gjeld truleg mange av dei andre bygningane i byen.

For småbarnsmora har det vore tøft å sjå nabolaget dei har blitt så glade i, øydelagt.

Familien flytta til Tyrkia då dottera var seks veker gamal.

– Vi har fått vener for livet i nabolaget her, og dottera vår har fått fleire leikekameratar, fortel ho.

bustadblokka til Marthe Hamre Owesen og sambuaren Jonas Svensson.

For familien er det tøft å stå oppi den store katastrofen som har råka Tyrkia. Vanlegvis lever dei eit godt og trygt liv i Adana, men måndag snudde det.

Foto: Marthe Hamre Owesen