Vesle julaftan fekk Sabrin Mohammed Ali melding frå Utlendingsnemnda (UNE) om at ho er utvist frå Noreg.
UDI og UNE meiner ho har brote utlendingslova ved å hevda at ho er frå Eritrea og ikkje Sudan.
At sønene Muaz (2) og Bilal (4) og faren deira har norsk statsborgarskap og blir att i Noreg, hjelpte ikkje. Vedtaket er endeleg.
Ein ny rapport kjem no med forslag til å mjuka opp regelverket i utvisingssaker som Sabrin si.
Eit av forslaga er at den som bryt utlendingslova som hovudregel ikkje skal visast ut, dersom det er best for familien å bli buande i Noreg.
Det blir òg foreslått ei raskare avklaring om opphaldsløyve for personar som er mellombels utviste, slik at familielivet kan halda fram i Noreg.
Rapporten kjem frå ei ekstern arbeidsgruppe som vart sett ned av Solberg-regjeringa i fjor sommar.
– Me har sett på om barnets rettar er tilstrekkeleg tekne i vare, forklarer Elizabeth Baumann, leiaren av arbeidsgruppa.
Ho seier norsk praksis kanskje har vore for streng over tid, men at arbeidsgruppa ikkje har haldepunkt for at Noreg bryt folkeretten.
Arbeidsgruppa var delt og mindretalet uttalte at dagens regelverk er godt som det er.
KrF vil setja saker på vent
Med referanse til rapporten foreslo KrF denne veka å setja alle utsendingar som rammar barn på vent, fram til eventuelle forslag til endringar og politisk behandling er ferdig.
– Me meiner det er på tide å ta eit steg tilbake. Me må sjå på evalueringa av dagens praksis og gjera eventuelle endringar før det blir fatta vedtak om å skilja barn og foreldre, eller senda ut heile familiar, seier Dag Inge Ulstein (KrF).
Men det seier justisministeren nei til.
– Det er ingen grunn til å stoppa behandlinga av utvisingssaker no. Arbeidsgruppa har ikkje funne nokon avgjerande skilnader mellom dagens praksis og Noreg sine folkerettslege forpliktingar, seier justisminister Emilie Enger Mehl (Sp) til Vårt Land.
– Kan oppmuntre illegale innvandrarar til å stifta familie
Per-Willy Amundsen (Frp) seier at ei liberalisering av regelverket i verste fall kan oppmuntra illegale innvandrarar til å stifta familie for å få opphald i Noreg.
– Me har allereie ei rekkje eksempel på at myndigheitene ikkje får utvisa valdelege og farlege kriminelle utlendingar, berre fordi dei har tilknyting til barn, seier han.
Grete Wold (SV) seier rapporten peikar på at barnets beste må uttrykkjast tydelegare.
– Folk bør som hovudregel ikkje bli utviste viss ikkje heile familien kan leva saman, seier ho.
Stortingsrepresentant for Arbeidarpartiet, Lene Vågslid, håpar rapporten startar ein større debatt om utlendingslova.
– Når det gjeld spørsmål om det er grunnlag for å setja saker på vent, er dette ei type avgjerd som ligg til Justisdepartementet.