Totalforbod mot open eld i heile fylket

Januar har vore ein svært tørr månad i heile fylket og kraftig vind gjer at branntilløp fort kan komme ut av kontroll og gjere store skader.

Meteorologisk institutt har tysdag gått ut med åtvaring mot lokalt stor gras-, lyng- og skogbrannfare til det kjem nedbør av betydning. Fleire stader i landet er det no forbod mot open eld.

– Dersom ein har følgt med i media og sett brannen som no herjar i Nord Trøndelag, så er det faktisk tilsvarande tørt også her hos oss, seier leiar ved Alarmsentralen i Sogn og Fjordane, Terje Brandsøy.

– Uforsvarleg å brenne

I Flatanger i Nord Trøndelag fryktar politiet at 139 bygningar har gått tapt i lyngbrannen som har spreidd seg i Hasvåg, Hårstad, Uran og Småvær.

Ein har også storbrannen i Lærdal for vel ei veke sidan friskt i minne. Her gjekk 40 bygningar tapt. NRK har snakka med fleire brannsjefar kring om i fylket, som no legg ned forbod mot open eld.

• LES OGSÅ: Difor er brannfaren så stor

(Artikkelen held fram under videoen)

– Vi har generelt brannforbod, så her er det absolutt ingen som skal brenne bål. Vi har fått nokre spørsmål, men det blir blankt avvist. Det er heilt uforsvarleg å brenne slik det er no, seier kommunalteknisk sjef i Høyanger, Arne Hauge.

– Ekstremt forbod

I helga var det fleire brannar, mellom anna i Stryn. Tysdag rykte også brannvesenet i Fjaler og Hyllestad ut til ein brann på Øveråshøgda. Denne kom raskt under kontroll. Før helga frykta ein ny storbrann då det byrja å brenne i ein bygning på kaien i Kalvåg. I Luster gjekk eit bustadhus opp i flammar.

Etter å først ha åtvara mto bråtebrenning, innfører også Brannvesenet i Sør-Rogaland no totalforbod mot bruk av open eld utandørs. Forbod er det også i Nordland.

• LES OGSÅ: – Sjølv den minste eldrest kan få fatale følgjer

Ved alarmsentralen i Florø vedgår Brandsøy at det er rimeleg ekstremt å leggje ned totalforbod i eit heilt fylke.

– Men det er viktig å førebygge. Vi har utruleg mykje tørt rotegras kring om, og vi har hatt lang periode med tørt, kaldt og fint vêr. Vi har lite snø nedover i fjellsidene, så faren er stor for at dette kan utvikle seg stort om det først tek fyr, seier Brandsøy.

– Har ikkje anna val

Bernhard Øberg som er brannsjef i Førde og Naustdal er klar på at det ikkje er nok å be folk vere forsiktige.

– Det viser seg dessverre at det ikkje er nok. Vi må leggje ned forbod for at folk skal forstå at dei må respektere den situasjonen vi har no med lite nedbør og vind, seier han til NRK.no.

Brannsjefen har aldri tidlegare vore med på å leggje ned forbod mot open eld midtvinters, men seier dei ikkje har noko anna val. Øberg er klar på at alt som kan gjerast for å unngå tilsvarande brannar som dei i Lærdal og Trøndelag må setjast i verk.

– Det er ikkje meldt nedbør komande veke heller. Vi må gjere det vi kan for å unngå liknande brannar.

Legg ned totalforbod

Brannsjef Arvid Gilje i Aurland seier han vurderer forbod, medan det i Lærdal allereie er forbod mot gravlykter og open eld på kyrkjegardane i kommunen.

Kjell Navelsaker, brannsjef i Gaular, seier det einaste rette no er å leggje ned totalforbod mot all bruk av open eld utandørs.

– Vi har til og med lagt ned forbod mot å tenne opp dei fine gravlyktene, og det seier noko om kor ekstrem situasjonen er, seier brannsjefen til NRK.no.

– Alle må bidra

Han har med skrekk og gru følgd med på det som skjer i Trøndelag, og meiner alle må bidra til å unngå at det kan oppstå liknande brannar.

– Brannen i Trøndelag viser kor skremmande farleg situasjonen er for tida. Det er ekstremt tørt, og med den vinden vi har vil eit open eld kunne spreie seg raskt, seier Navelsaker, som ikkje tidlegare har vore med å leggje ned liknande forbod vinterstid.

– Vi må gjere dette for å beskytte både bygdene og folket. Det er så lite som skal til, seier han og oppmodar folk om å raskt melde frå om dei ser noko som kan likne på brann i terrenget.

– Meld ifrå

Denne oppmodinga ynskjer også Brandsøy hos Alarmsentralen i Florø presisere.

Han seier at noko så lite som ein sigarettsneip på feil plass til feil tid kan få katastrofale følgjer.

– Det er veldig viktig at folk ringer inn straks ein ser det som kan vere brann eller tillaup til brann. Vi har faktisk opplevd at vi får melding om brann frå ein innringar, men som det hadde vore naturleg at fleire hadde sett. Det er betre å ringe ein gong for mykje enn for lite, seier Brandsøy.