I dag fyller dei fotballbana med tusenvis av folk

I dag er dagen sogn- og fjordingar har venta i vekevis på å få oppleve. Det som starta med ein gigantkonsert på Rådhusplassen i Oslo, blir i dag avslutta på kunstgrasbana i Førde.

Og folk bør vere tidleg ute for å sikre seg dei beste plassane.

• Les også: Slik må du parkere under VG-lista

– Det er mykje råflotte artistar, og ikkje minst har vi med oss førsteplassen på VG-lista, Julie Bergan. Det er kjekt å ha den mest populære låten i Norge live, seier Marie Komissar, prosjektleiar i NRK P3.

Er du på konserten? Merk gjerne bileta dine med #nrksf på Instagram

Heim med kjempehit

Konserten blir arrangert i samarbeid mellom VG og NRK og den er gratis og open for alle. Dørene opnar klokka 18, men området er ope for publikum frå klokka 12. Utover dagen blir det også lydprøvar som folk kan følgje.

• Les også: Oppgraderer Førde for å unngå VG-lista-kaos

Blant artistane er Iselin Solheim frå Naustdal, som saman med Alan Walker har to låtar på VG-lista. I dag er ho utan nemnde Walker når ho meir eller mindre syng på heimebane.

• Les også: Dette er stemma bak låten som toppar listene

– Det er utruleg gøy at vi har Iselin med oss. At ho har to låtar inne på VG-lista må vere stort for eit lokalsamfunn, seier Lise Rønneberg, eventsjef for VG-lista.

Vann konkurranse

Frå før har turneen vore innom storbyane Oslo, Bergen, Stavanger og Trondheim.

Førde slo 118 byer og tettstader i kampen om å bli den siste staden som får huse VG-lista. Kampen vart avgjort basert på kven som klarte å skape mest engasjement rundt sin by, ved hjelp av videoar, kreative bilete og meldingar på sosiale medium.

Sjølv om det er venta nedbør, trur ikkje Rønneberg at det vil legge dempar på folkefesten.

– Det er veldig gøy for oss å gi ei slik førestilling med så mange artistar på ei scene i trygge rammer. For mange, spesielt mindre born og familiar, så er det ein av dei første konsertopplevingane. Mange fortel om sitt første kyss for dagen før eller etter, og mange har hatt ein god dag med kameratar og veninner, seier ho.

Plass til 20.000

Heller ikkje Øyvind Solstad i VG trur vêret vil påverke regnvande vestlendingar stort når så mange store nasjonale artistar vitjar bygdebyen Førde.

• Les også: Sunnfjordingane lokka hitlista til Førde

– I Trondheim kom det kring 13.000, men vi har håp om endå fleire her. Med det engasjementet som var under konkurransen, så trur eg vi skal klare det, seier Solstad og legg til:

– Det er god plass på Førde stadion. Kjem det 10.000 fyller vi eine banehalvdelen, så her er det plass til 20.000, seier han.