Mann i 20-åra nektar straffskuld for drap på mora: – For han er dette surrealistisk

– Han nektar straffskuld. For han er denne situasjonen heilt surrealistisk. Det er eit stort sjokk, seier forsvarar Jørgen Riple.

Den sikta mannen har sete i avhøyr med politiet i fem timar søndag.

– Han har fått beskjed om at mora er død, ein person han har vore glad i og sete stor pris på. Han er sjølvsagt lei seg, seier Riple, som legg til at sonen har nesten ingen erfaring med politiet.

Mannen vil bli framstilt for fengsling i Bergen tingrett måndag klokka 10.

– Han var villig til å forklare seg for politiet. Vi vil ikkje gå ut med innhaldet i forklaringa hans, opplyser politiet.

Pågripen ein annan stad

Mora hans vart funnen død i sin eigen heim ved 20.30-tida laurdag kveld og politiet var på staden like etter. Mannen i 20-åra vart pågripen i 21-tida.

Den sikta vart ikkje pågripen ved Brattholmen, men ein annan stad.

Mannen vart frakta til politihuset i Bergen laurdag, der det vart teke kriminaltekniske undersøkingar av han. Han er no arrestert.

Det opplyste påtaleansvarleg Christine Møen Wisløff under ein pressekonferanse på politihuset i Bergen sundag.

Mannen ville ikkje bli avhøyrt laurdag.

– Vi takka nei til eit avhøyr klokka 02 i natt. Han var trøtt og eg var trøtt, seier Riple.

– Hyggeleg og oppegåande

NRK har prata med naboar til kvinna som døydde.

– Eg er sjokkert over det som truleg har skjedd. Dette er eit stille og fredeleg område. Folk går på jobb, og det er som i alle andre bygder, seier Sveinung Iversen.

– Dette er ikkje anna enn tragisk. Ho verka som ei hyggeleg og oppegåande dame, seier nabo Tommy Lilleheil.

Han beskriv hendinga som uverkeleg.

Vitne varsla

Det var vitne på staden som varsla politiet om dødsfallet i eit bustadfelt på Brattholmen på Litlesotra laurdag kveld.

Politiet har i heile natt jobba med kriminaltekniske undersøkingar i bustaden, og det er sikra elektroniske spor.

– Vi har avhøyrt fleire vitne i saka, både meldar og omgangskretsen til dei involverte, seier Møen Wisløff.

Politiet vil førebels ikkje seie noko meir om dødsårsak, bakgrunn eller hendingsgangen.

– Ein av hypotesen er at dette er eit drap, men vi bind oss ikkje til noko hypotese så tidleg i etterforskinga, seier Møen Wisløff.

– Forferdeleg tragedie

Rettsmedisinar Inge Morild ved Gades institutt gjorde innleiande undersøkingar i natt. Politiet haldt fram med undersøkingar på staden utover dagen.

Den avdøde vil bli obdusert tysdag.

– Dette er ei forferdeleg tragedie. Meldinga kom som eit stort sjokk på familien. Dei er i djup sorg og ber om ro i denne vanskelege tida, seier bistandsadvokat Ellen Eikeseth Mjøs.