Ikkje ein gong rå muskelkraft stogga Kupen

Diverre for heimelaget, var alle scoringane signert Florø-spelarar. Til pause var det målet til Erlend Hove som skilde dei to laga.

Etter kvilen gjorde Florø som dei ville mot eit tafatt Førde-lag, og var nærare 5–0 enn vertane var scoring.

– Første 20 minuttane var det mykje rot og ikkje fotball i det heile. Vi er heldige og får ei scoring. Så kjem vi ut i andre omgang, får vinden i ryggen og køyrer over dei. Det skulle vore meir enn 4–0. Var det ikkje fire, spør Florø sin tomålshelt frå Nordfjord, Endre Kupen.

– Greitt med 4–0 mot Førde

I alt 2 503 tilskodarar, jamt fordelt mellom Førde- og Florø-patriotar, hadde teke turen til Hafstadparken.

– Det er alvorleg mykje folk, seier Kupen og kan konstatere at i alle fall halvparten av tilskodarane fekk valuta for pengane – og turen.

Sjå bileta frå folkefesten på Førde stadion 21 bilder

– Det kunne fort vore seks-sju null, men det er greitt med 4–0 borte mot Førde på 16. mai. Det er herleg. Heilt konge. Eg fekk fem minuttar i fjor, så det er første gang eg er skikkeleg med på dette, legg han til etter Florø sin sjette seriekamp utan tap i år.

Sleit med Kupen

Sjølv kan Kupen titulere seg avdelingas toppscorar etter to mål mot Førde. Allereie er han oppe i like mange som i heile fjor – sju mål. Det eine frå 11-metersmerket, etter ei straffe han sjølv sytte for. Førde-kaptein Joachim Kvist kom på etterskot mot det raske uromomentet frå Selje.

– Situasjonen er utanfor, men dommaren dømmer det innanfor, men det er nok vanskeleg for han å sjå. Akkurat no kjennest det berre heilt forferdeleg ut. Vi fell heilt igjennom i andre omgang, seier ein tydeleg skuffa Kvist.

– Var det Kupen som vart avgjerande?

– Tja, han gjer to mål, er ein god spelar og jobbar godt. Vi skaper nesten ikkje sjansar, medan han skapar mykje på eiga hand.

– Endre herjar

– Endre herjar. Han sleit litt i starten, men no har han kome som ei kule i år. Han er betre enn nokon gong, rosar Florø-trenar Terje Rognsø og legg til:

– Vi ser det heile tida. Store midtstopparar har store vanskar med å handtere han, og då er det om å gjere for oss å mate han rett. Tempomessig er han ekstremt bra på dei første meterane, og så har han veldig bra teknikk.

– Snakkar vi opprykk no?

– Nei, eg har sagt heile tida at Nest-Sotra blir tøffe, men eg håpar at vi er der oppe.

Førde nest sist

Toppscorar Kupen er meir optimist. Etter kampen i dag er Florø eitt poeng bak serieleiar Nest-Sotra.

– Det er litt tidleg endå, men vi har ikkje tapt til no og skal ikkje tape. No har vi Lysekloster heime neste helg, og då skal vi køyre på der også. Eg håpar på mange mål, seier han.

For Førde og kaptein Kvist er det derimot trist sorti med berre to poeng på fem kampar. Laget er nest sist i divisjonen.

– Vi har slite med å score sidan starten, men vi har halde tett. No har vi byrja å sleppe inn mål, samstundes som vi slit med å skape sjansar. Vi har litt å jobbe med, konstaterer han.