Høgt over bakken, der ekorn og kråker knivar om plassen har faunaen fått eit nytt tilskot.
Tretopphytter er ikkje lenger berre klubbhus og barnestrekar.
Men likevel:
– Dette er ikkje kvardagskost, seier Martine Sommerfeldt og kikkar utover Gloppenfjorden.
Ho og ektemannen Alf Georg fall for freistinga til å nyte romjula mellom tretoppane i Gloppen.
– Vi kom først og fremst hit for å oppleve snøen, utsikta og oppleve kjensla av å bu tett på naturen, fortel ekteparet som kjem frå Karmøy i Rogland.
Veksande trend
Dei seinare år har fleire fått opp auga for å overnatte på særeigne stadar.
På fjellknausar, i fjøresteinane, høgt blant tretoppar eller i ei kongleforma hytte på skogbotnen, moglegheitene ser ut til å vere uendelege.
– Det som er felles for desse er at dei har ei spektakulær plassering, seier Merete Habberstad, kommunikasjonsdirektør i NHO Reiseliv.
Satsar på det unike
For hyttegründerane Olav Aabrekk og Jan Roger Engeset har sesongen berre blitt lengre og lengre sidan dei bygga den første hytta.
– Det som er litt artig er at folk kjem spesielt for å bu her, ikkje berre fordi dei er på gjennomreise. Dette er turmålet, seier Jan Roger Engeset
I ei tid der hotell slit med å halde hovudet over vatn har det luftige hotellrommet hatt fulle bestillingslister.
– Då vi opna i mars blei det fullbooka ut heile sesongen til vi stengde igjen i slutten av november, so det har vore heilt fantastisk, seier Olav Aabrekk.
Vil ha opplevingar
NHO Reiseliv har merka seg at folk ynskjer unike opplevingar som ein kan dele og hugse lenge. Og trur at dette har forsterka seg gjennom pandemien.
At å overnatte mellom tretoppane er populær overraskar ikkje ho i det heile.
– Dette spelar på gamle draumar frå då ein var liten og ein bygga hytter oppi trea, det er noko nostalgi over det, seier Merete Habberstad.
Oppleving under juletreet
Ifølge ei undersøking NHO gjennomførte om nordmenn sine julegåveplanar, kom det fram at ein av fire planla å gje ei oppleving i gåve.
– Det har nok vore ein del tretopphytteopplevingar under juletre mange stader i år, seier Habberstad.