Fjøsbrann utanfor Florø

Ein sauefjøs har brent ned på øya Kinn utanfor Florø. Brannen starta kring klokka 19.

Dei 20 sauene i fjøsen skal i fylgje politiet vere redda ut av folk på staden, og alle personar er gjort greie for.

Sløkkeinnsatsen har forhindra at brannen har spreidd seg til nabohus, og det blir spylt vatn på omkringliggande bygningar, melder 110 Vest.

Brannvesenet brukte ambulansebåt frå Florø. Det tok vel 40 minutt før brannmannskapet var framme.

Litt over ein time etter at brannen starta hadde brannmannskap kontroll på brannen.

– Vi saknar sårt ein eigen båt for brannvesenet i Florø, seier innsatsleiar Pål Eielsen i Kinn Brann og redning til NRK.

Ut på kvelden brann det framleis på staden, det vart jobba med å forhindre spreiing til terrenget. Kystvaktskipet KV Andenes kom også til området. I natt var det brannvakter på staden.