– Vi ser alvorleg på at skilt blir fjerna på denne måten. Det er ein kostnad for oss og for turistane er det ei informasjonskjelde i forhold til kva kommune dei kjem til, seier prosjektleiar for drift i Statens vegvesen i Nordfjord, Lars Erik Karlsen.
Det er på kommunegrensa mellom Hornindal og Stryn ved riksveg 15 at kommuneskiltet til Hornindal kommune er fjerna i løpet av natta.
Skilt kjem og går
Det er ikkje første gong at det blir herja med skilta i kommunen eller at kommuneskiltet blir fjerna.
– Dette skiltet er det første gong blir fjerna. Tidlegare i sommar vart eit anna kommuneskilt fjerna. Det har vi ikkje funne att. Vi oppdaga tidlegare i sommar at eit skilt frå Namsos var komme opp i same område. Så det er klart vi ser alvorleg på det.
- Les også:
Statens vegvesen har ikkje noko klar meining om kva som kan vere grunnen til at skilta blir skrudde ned. Men dei avviser ikkje at kommunesamanslåingsdebatten kan vere eit bakteppe.
– Det er nærliggande å tenke at det har med debatten i Stryn, Volda og Hornindal om samanslåing å gjere, men det blir spekulasjonar.
Han håpar syndarane som har skrudd ned skiltet melder seg eller i det minste set tilbake skiltet.
– Vi håpar dei tar til fornuft og at dei set tilbake skilta på ein sånn måte at vi kan finne dei att. Elles vil vi vurdere å politimelde dette og reise erstatningskrav, men vi håpar vi slepp det.
Vil uansett eksistere som geografisk område
Ordførar i Hornindal, Stig Olav Lødemel, synest det er trasig at folk ikkje respekterer skiltinga.
– Det er beklageleg at skiltet blir fjerna for Hornindal er uansett eigen kommune fram til 2020. Deretter får vi sjå korleis det blir. Men uansett kjem Hornindal til å eksistere som geografisk område.
Han er ganske sikker på at samanslåingsdebatten er årsaka til at skiltet blir fjerna.
– Det er naturleg å tru at det er bakteppe her. Det er ikkje nokon som har tatt skilta våre før, så det må vere naturleg å tru.
Men om det er forkjemparar som ønskjer fortgang i samanslåingsarbeidet vil ikkje ordføraren seie noko om.
– Nei, det har eg ikkje noko meining om humrar ordføraren.
Meir alvorleg understrekar han at det å fjerne annan manns eigedom kan medføre straff.
– Så eg håpar dei tar til vet og set skilta tilbake.