Filmen «Frost» lokka Koki til vinterfjorden

Tre tynnkledde og luelause japanske studentar hutrar på ferjedekket. Med stive fingrar arbeider dei med fotografiapparata sine for berga minna av ein stille, blank fjord for ettertida.

Takayuki, Koki og Shintaro frå Tokyo har sete 20 timar på fly for å sjå det landskapet som dei for fyrste gong såg i ein populær Disney-film:

– Me blei fengsla av «Frost» og ville sjå naturen som filmen har henta inspirasjon av. Difor kom me hit til Nærøyfjorden. Me ville sjå den fantastiske naturen med eigne augo, seier Koki Moriya, før han må kneppa att også den øvste frakkeknappen, for å halda kjølda ute.

• Les også: Disney-suksess skal gi klingande mynt på Vestlandet
• Les også: Julegave fra Disney til norsk reiseliv

Vinterturismen veks

Stadig fleire reisande gjer som dei tre japanske kompisane; dei kjem til turistbygda Flåm – om vinteren – for å sjå landskapet som står på Unesco si liste over verdas viktigaste naturområde, og for å ta Flåmsbana.

Den rullande turistmagneten, som klyv opp dei bratte kleivane i Flåmsdalen, har hatt markant vekst i vinter, 12 prosent i januar og 16 prosent i februar.

– Potensialet er stort, fordi vinterturistane kjem frå store marknader i Asia og Amerika. For dei er snø og kulde eksotisk, seier Solrun Hjelleflat, dagleg leiar i reiselivsselskapet Flåm AS.

• Les også: Disney-film trekker amerikanske familier til Norge
• Les også: Ny «Frost»-film på vei

Heilårsarbeid

Flåm AS la i fjor haust ned ein ekstra innsats for å lokka vinterturistar, og det er i ferd med å gi dei ein ny fot til å stå på. Veksten i lågsesongen gjer at det forsvarleg med heilårsarbeidsplassar.

For første vinter på mange år held Fretheim Hotel ope. Flåm Guideservice lagar vinterturar for einskildreisande, og det er sett opp ei heilårs bussrute frå Flåm stasjon til Stegastein – utsiktspunktet 650 meter over Aurlandsfjorden.

– Når turiststraumen om vinter veks, må me ta imot dei på skapleg vis. Difor er det gledeleg at hotella held ope, og at vinterturistane har fleire tilbod å velja mellom, seier Hjelleflat.

Avslappa av landskapet

Tilbake på ferjedekket til «Fanaraaken» ser Koki Moriya snøkledde lier og veldrivne småbruk gli forbi. Vinterlandskapet får han til å slappa av:

– Tokyo er overbefolka, og folk er alltid stressa. Her kjenner eg meg roleg. Når eg kjem heim, skal eg visa bileta av naturen til venene mine og seia at også dei må reisa hit.