Ferje på grunn på Fure

Ifølgje meldinga på høgtalaranlegget på ferja må både mannskap og passasjerar om bord vente på at sjøen skal flø for å få dratt ferja av grunn.

Passasjer Vigdis Løberg trudde først at ferja hadde køyrt rett i kaien.

– Eg tenkte det var jammen ein bråstopp. Eg trudde ferja køyrde rett i kaien, men då eg såg ut såg eg at vi ikkje var ved kai likevel.

Bomma på kaien

Løberg seier det ser ut som ferja har bomma på kaia.

– Ferja vil eg seie har bomma på kaia. Den har køyrt på land 10–20 meter lenger nord enn kaia og står no på eit skjær.

Ingen vart skadde i grunnstøytinga då ferja skulle legge til kai klokka 10. Ifølgje Løberg har ikkje passasjerane fått panikk. Det er 11 passasjerar og eit mannskap på fire om bord i ferja som var på veg frå Askvoll til Fure.

Tre trailerar om bord er blitt flytta for å hindre at ferja får meir slagside der den ligg på skjæret.

Ein båt frå eit nærliggande oppdrettsanlegg har prøvd å dra ferja av grunn, men førebels har passasjerane fått beskjed om at dei må vente på flo sjø før dei prøvar att.

Ventar på flo

Stig Kristoffersen i Fjord1 seier at dei førebels ikkje kan seie noko om årsaka til at ferja har gått på land.

– No er det snakk om å prøve å sikre at det ikkje blir lekkasje frå ferja. Så er det snakk om å få den av grunnen. Det vil vere flo sjø kring klokka 13, så vi vil vente på meir vatn under kjølen før vi prøver å få den av, seier Kristoffersen.

For oppdatertert trafikkinformasjon sjå www.fjord1.no.