I fleire veker har det vore kaldt og kvitt ute over heile landet. No har vêret snudd, og gradestokken viser plussgrader.
Det betyr også at det snøen forsvinn, og mindre hyggelege ting kjem til syne.
Nikoline Antonsen Steinsland (5) og Tiril Knudsen Pugerud (5) frå Åsane i Bergen blir ofte avbrotne i leiken fordi dei får hundebæsj på seg.
På ti meters strekning fann dei fire stykke.
No synest dei nok er nok, og har sett opp heimelaga skilt.
Viftar med posen
Men det er ikkje berre i Åsane at hundeskiten kjem til syne.
Jorunn Eide Kirketeig frå Førde er dagleg på tur med hunden sin Storm. Ho er ekstra provoserte no når snøen smeltar.
– Dette er irriterande, eg vil ikkje at folk skal plassere meg i same kategori, seier ho.
Ho vil ikkje bli assosiert med hundeeigarar som ikkje tek med seg driten. Derfor viftar ho ekstra med posen.
– Eg går med posen akkurat no når temaet er så heitt, så viser eg i alle fall at vi plukkar opp etter oss, seier ho.
Berre i Førde er det plassert ut rundt 90 bosspann, fleire av dei merka for hundeposar.
Det fortel Leif Halvor Kårstad, einingsleiar i Sunnfjord kommune.
– Det er mellom 60 og 200 meter mellom dei. Eg synest ikkje folk kan skylde på at det manglar bosspann, seier han.
Inviterer til konkurranse
Hundeeigar Ole Morten Størseth i Kristiansund er derimot lut lei sytinga og starta difor konkurranse i å plukke opp.
Den ivrige hundeeigaren oppmodar alle i nærområdet å plukke alt dei kan for å vere med i trekninga av eit gåvekort og gratis vaksine til hunden.
– Det er ikkje berre at hundeskiten er ubehageleg å trakke i. Den kan vere farleg for dyra, sidan den kan innehalde parasittar og andre sjukdomar, seier Størseth.
Bente Elvebu laga denne instruksjonsvideoen til hundeeigarar etter å ha blitt rasande over all hundebæsjen på Overåsanden i Hareid.
Meiner vi må tole det
Siri Helle frå Askvoll er ei av dei som meiner synleg hundeskit er noko ein bør forvente å sjå.
– Eg har endå til gode å irritere meg over ein rein hundebæsj, seier ho, som derimot let seg irritere over posar med hundebæsj.
– Det er seigt å trakke i hundebæsj, supplerer Hanne Stedje frå Årdal.
Høyr diskusjonen mellom dei i fredagspanelet her:
Ho ergrar seg ikkje over avføringa, men heller eigarane.
– Men vi kan jo sjå positivt på det, våren er tydelegvis komen. Det verkar som at hundeeigarar trur at det forsvinn dersom dei berre spenner litt snø over det. Då blir eg oppgitt, seier Stedje, som sjølv har vore hundeeigar.
– Vil vi ha hundar i verda må vi også tolerere at det er hundebæsj i verda, slår dei fast.