Meiner Fannemel snart vil hevde seg i toppen i kvart renn

– Anders Fannemel er ein hoppar med enormt stort potensial. På sitt beste hoppar han på enormt høgt nivå, seier Jan-Erik Aalbu, som sjølv har vore hoppar og ekspertkommentator for NRK i hopp.

Anders Fannemel frå Hornindal hamna under dagens renn under Hoppveka på 7. plass, og hoppa seg dermed inn til ein 19. plass samanlagt i dei tradisjonsrike renna, som blir gjennomført ved kvart nyttår.

• LES OGSÅ: – Jeg fikk tatt et par store skritt i dag
• LES OGSÅ: Ergrar seg framleis over Oberstdorf-miss

Sjølv med ei god avslutning, har det også vore mindre vellukka hopping av Fannemel under hopprenna den siste veka.

Fannemel gjekk frå å vinne kvalifiseringsrennet eine dagen, til å ikkje klare å kome seg vidare til andre omgang då det verkeleg gjaldt.

• LES OGSÅ: Dropper renn for å komme i form

– Fannemel gjer at hopping ser enkelt ut

Aalbu, som var sportssjef for hopplandslaget på 2000-talet, meiner Fannemel vil få meir sjølvtillit og tryggleik etter kvart, og at det då blir alvorleg moro å følgje Honndølen.

– Ein kan aldri garantere i ein utandørsidrett, men eg er trygg på at når han får meir tid på seg, så vil han bli svært god. Eg ventar på den dagen han får stabiliteten som dei beste hopparane har. Han er lett og fin i kroppen, har herleg teknikk og flyt godt.

Den tidlegare ekspertkommentatoren meiner at Fannemel allereie denne sesongen vil stabilisere seg på eit jamnare nivå.

• LES OGSÅ: – Det burde ikkje vore renn i dag

– Han har synt at han kan under fleire renn i år, og eg er overbevist om at det vil kome. Eg meiner han vil vere med å kjempe om samanlagt sigrar i verdscupen etter kvart.

OL-billetten bør vere i boks

Aalbu er imponert over den unge hopparen og seier han vil bli overraska om det norske landslaget reiser til OL utan Fannemel.

– Eit norsk lag utan han ser eg ikkje for meg, då må det skje noko med forma hans.

Sjølv om Aalbu meiner at Fannemel gjer det meste rett, så er han også tydeleg på kva som kan gjerast betre.

– Anders er ein av verdas beste til å fly, forme kroppen og vere i svevet. Men, han har litt igjen å gå på når det gjeld å trykke ned, og få best mogleg høgde og effekt ut av hoppkanten. Når han får til det, då vil det berre vere kjekt å sjå han på fjernsyn, forsikrar Aalbu.