- Passasjerane kjem som aldri før, og det er generelt vanskeleg å tilby plassar til Oslo på kort varsel. Som regel må ein bestille ei veke før, for i det heile å få plass, seier lufthamnsjef Rasmus Mo.
Opp 27 prosent
Passasjerauken har dei merka òg ved dei andre flyplassane i fylket. Men det er i Sogndal den har gjort tydlegast utslag. I mars var det til dømes ein auke i reisande på 27 prosent samanlikna med same månad i fjor. Mo seier stabile verforhold er ei medverkande årsak til auken, men trur passasjertala uansett vil halde seg stabile.
- Fly blir meir og meir viktig for folk å nytte, seier Mo, og dreg fram Mesta som eit døme på ei bedrift som genererer mykje flypassasjerar i Sogndal.
Utvidar
På Sogndal Lufthamn har dei starta arbeidet med å utvide terminalbygget på grunn av liten plass. Dei er òg i dialog med Widerøe om korleis dei skal få plass til alle som ønskjer å reise med fly.
- Vi er invitert av Widerøe til å diskutere slike utfordringar, og vi har ein god dialog der vi utvekslar tal og erfaringar, seier Mo.