Når Ap fekk 77,5prosent av stemmene og 16 av 21 mandat i kommunestyret ved valet i Årdal i 2007, er det forståeleg at andre parti sukkar oppgitt og kjenner på maktesløyse og resignasjon.
Dette har prega det politiske miljø i Årdal i alle år. Dette er Ap-bastionen i landssamanheng. Flaggskipet til Det norske Arbeidarparti. Det gjev både makt og innverknad så lenge Ap sit med makta også i regjeringskontora.
"Same procedure"
Det er ingenting som tilseier at resultatet i Årdal skal bli særleg annleis i år. Det som kunne øydelagt var om sjukehuset i Lærdal hadde blitt behandla like "ille" som Nordfjordeid av sitjande regjering.
Men mens Nordfjord attpåtil fekk mindre enn dei hadde frykta, fekk Lærdal i overkant av det dei såg som verste scenario. Dermed har Ap truleg tapt lite i denne regionen på sjukehussaka.
Hadde regjeringa også fått på plass modernisering av Hydro i Årdal, ja då kunne lett valresultatet i år nærma seg 100 prosent ......
Utfordrarar
I den grad ein kan kalle dei det i Årdal, så er kanskje Senterpartiet utfordrarane. 10 og 7 prosent ved dei to siste vala skremmer ingen, men det er verdt å merke seg at Sp-lista i Årdal i år er "full" av unge framadstormande politikarar, bak "veteranen" Erling Offerdal.
Frp og Høgre stiller liste med Geir Sandvik og Per Ole Hammer, mens SV ikkje greidde å stille liste i Årdal ved dette valet.
Ordførar?
Han heiter Arild Ingar Lægreid, og det kjem han til å heite også etter valet – bankers!