Ho gav opp alt anna for jobben ho elskar - no står ho i fare for å miste den

Tysdag vart det gjennom Firdaposten kjent at minst ti årsverk kan forsvinne når Widerøe kuttar i flygingane til og frå Florø lufthamn 1. april i år.

– Eg er veldig redd. Eg er den som er sist tilsett, så eg veit at det er eg som mest sannsynleg må gå. Det er kjipt med tanke på at eg har etablert meg heime, seier Else Karin Seljeseth.

Frå 100 til 30 prosent stilling

Under reiselivsutdanninga fekk ho tilbod om sommarjobb med mogleg forlenging. Snart fem år seinare er ho framleis i jobben ho elskar.

– Eg synest det kjekt å vere ute heile dagen. Du jobbar variert, ingen dagar er like.

Ho er ho blant fire tilsette som har gått frå tilnærma 100 prosent stilling, og ned i 30 prosent. Seljeseth er kritisk til at regjeringa valde å innføre fri konkurranse på flyrutene til og frå Florø.

– Dei har ikkje tenkt på konsekvensane av det dei har gjort. Folk er ikkje villige til å betale 3–4000 kroner for ein flybillett.

Lufthamnsjef Siv Merete Stadheim seier konsekvensen av at den siste kveldsruta blir kutta, fører til kortare opningstid og eit behov for færre tilsette.

– Det er utfordrande. Det er synd for dei tilsette, men det er også synd for regionen at ein ikkje har eit tilbod med det siste kveldsflyet.

• Les også: Høgre vurderer å droppe kommersielle flyruter frå Florø

– Blei akkurat som vi spådde

Flora-ordførar Ola Teigen seier det har vore krevjande sidan Samferdsledepartementet valde å kommersialisere Florø lufthamn, og at det var nettopp dette dei frykta – færre avgangar og dyrare billettprisar.

– Det skulle bli betre, men no opplever vi at det blir akkurat som vi spådde. Det er uheldig for dei privatreisande, men mest av alt for næringsdrivande i Florø som rapporterer at det blir vanskelegare å drive næring frå Florø.

Teigen meiner det må vere passasjergrunnlag for å innføre fri konkurranse, men at det ikkje er nok passasjerar til å konkurrere om avgangane i Florø.

• Les også: Færre reiste med fly til og frå fylket i fjor

Frp-politikar Frank Willy Djuvik er derimot heilt usamd i at det er kommersialiseringa som har skulda.

Han meiner det er nedgangen i passasjertalet og Widerøe si tilpassing til passasjergrunnlag som har ført til høgare prisar og no færre avgangar.

– Dette har ingenting med kommersialisering å gjere, for dei endringane som Widerøe her gjer, det kunne dei gjort innanfor anbodssystemet også. Men fordi Widerøe legg opp til eit slikt ruteopplegg, så er det no mogleg at det kan komme andre aktørar inn, som vil gi eit betydeleg betre tilbod.