Eit ektepar i 60-åra landa på Flesland i midten av april etter å ha vore på reise i Spania. I tråd med reglane skulle dei ha brukt karantenetida på hotell.
Men det ville dei ikkje.
– Hovudregelen no er at dei som kjem inn i landet må på karantenehotell. Det finnast unntak, men ingen av desse slo til i dette tilfellet, fortel politiadvokat Laila Skeide.
Krav om opphald på karantenehotell ved framkomst Noreg vart innført 19. mars.
Ifølgje Skeide meinte ekteparet at det ville vere vel så trygt å reise heim til seg sjølve.
Utanlandsturen vart ikkje rekna som nødvendig, og no må kvar av dei betale 20.000,- kroner i bot.
– Desse bøtene er standardiserte, fordi det er eit poeng å ha lik behandling for alle som bryt reglane, seier politiadvokaten.
Til saman får ekteparet 40.000 kroner i bot.
– Vi har ikkje fått svar på korleis ekteparet stiller seg til bota, legg Skeide til.
6. april opplyste Ullensaker kommune at rundt 30 personar var meldt til politiet for å stikke frå hotellet dei skulle sitte i etter utanlandsopphald.
Smitta hadde besøk i eigen heim
Ekteparet i Bergen er ikkje dei einaste som no må betale dyrt for ikkje å overhalde reglene for smittevern.
Ein mann i 20-åra frå Førde i Sunnfjord har fått bot på 20.000 kroner for brot på isolasjonsplikt etter at han var bekrefta smitta.
Den unge sunnfjordingen skal hatt besøk av andre i sin eigen heim i perioden han skulle vere isolert.
Oslo er politidistriktet i landet med flest koronasaker. Over 500 saker har blitt tatt hand om sidan mars 2020.
I Vest politidistrikt har det sidan mars 2020 blitt gitt ut 36 bøter for brot på smittevernreglane. Satsen på bøtene varierer frå 5000 kroner ti 27.000 kroner, avhengig av alvoret i saka.
Denne helga vart to personar i 20-åra meldt til politiet etter ein fest på Møhlenpris i Bergen sentrum.
Politiet rykka ut festen i ein leilegheit etter klager på støy. Det var 12 personar på festen, og alle er identifisert.
– Dei var for mange samla i leilegheita. Arrangørane, som er dei to som bor på adressa, vert difor meldt for brot på den lokale covid-forskrifta, seier politioverbetjent Sissel Becker til NRK.