Brannvesenet melder no at dei har kontroll på brannen.
Klokka 12 melde dei at røykdykkarane måtte avslutta sløkkearbeidet innvendig av omsyn til sin eigen tryggleik. Sløkkinga av brannen i Lindås skjer no berre frå utsida.
– Det er på veg folk som skal vurdera skadene i første etasje, men det ser ut som den etasjen er ganske uskadd, seier vaktkommandør Ole Jakob Hartvigsen ved 110-sentralen.
– Då eigaren av huset kom til staden, forklarte han kvar ammunisjonen var lagra i første etasje. Dermed kunne brannvesenet henta ammunisjonen ut, seier operasjonsleiar Hans Eirik Thue i Vest politidistrikt.
Evakuert
Huset er overtent og sløkkinga er i gang. Alle naudetatane er på staden. Det brenn i andre etasje i huset.
– Det er ikkje meldt om at brannvesenet har kontroll på brannen, men det skal ikkje vera fare for spreiing, sa Thue klokka 12.
Like etter at brannen vart meld klokka 11.10 fortalde Hartvigsen at naboar var evakuert frå staden fordi det var lagra jaktammunisjon i huset.
Opplysningane om ammunisjon hadde politiet fått frå huseigaren.
Det vart oppretta ei tryggleikssone på 100 meter rundt brannstaden.
– På grunn av problem med vasstilførselen vart det kalla inn ekstra tankbilar, seier Hartvigsen.
Huset ligg i det relativt nye bustadområdet Ørnetua ved Vågseidet, omlag midtvegs mellom Knarvik og Mongstad.