Klokka 03.20 natt til torsdag fekk brannvesenet melding om røykutvikling i kjellaren på eit bustadhus på Sunde i Kvinnherad.
– Under kontakten med meldar spreidde brannen seg raskt, fortel operasjonsleiar Dan Erik Johannessen i Vest politidistrikt.
Lokal innsatsleiar Thomas Hallquist i Kvinnherad brann og redning, fortel at han var første bil på staden.
– Då eg kom fram var det allereie flammar ut av vindauga i første og andre etasje, og over taket. Så det gjekk utruleg raskt, fortel han.
På dette tidspunktet hadde dei kontroll på personane i huset, og dei visste at ingen var inne i det overtente huset.
– Huseigar kom seg heldigvis ut i tide, seier Hallquist.
Han skal ikkje ha fått i seg røyk.
Kraftig vind i området gjorde sløkkjejobben vanskeleg, og ein periode frykta brannvesenet at brannen skulle spreia seg til nabohus.
Fire bebuarar i andre hus i området vart difor evakuerte.
Når NRK snakkar med innsatsleiaren rett etter klokka 6 har dei kontroll på staden.
Dei driv med ettersløkking, og fleire brannbilar har returnert.
– Men huset er totalt nedbrent, seier Hallquist.