Orkanen «Tor» er det sterkaste ein har målt i Norge – nesten ingen får erstatning

– Skadane er på ein million kroner, eg skjønar ikkje at vêret ikkje var gale nok, seier Rolf Vingelven.

Vingelven og kona bur på ein av dei mest avsidesliggande gardane i Nordfjord. Hit kjem ein berre etter 20 minutt med båt.

Under orkanen «Tor» i januar 2016 knuste bølgjene moloen og flytta steinar som stengde innløpet.

Men Statens Naturskadeordning meiner sjøen under «Tor» ikkje var grov nok. Alle som har søkt om erstatning på skader på molo eller kai har fått avslag.

– Vatnet som kom inn er noko av det verste eg har sett, sjøen braut over og det var ikkje råd å gå ute på grunn av vindstyrken, seier Vingelven.

– Ein molo kan ikkje blåse ned

Statens Naturskadefond har fått inn 77 søknader om naturskadeerstatning etter «Tor». 22 skader som skuldast sterk vind er innvilga, medan dei 45 som skuldast grov sjø fekk avslag.

– Naturhendinga var storm. Ein storm fører ikkje til direkte skade på kai eller molo, fordi slike objekt ikkje bles ned. Under «Tor» har kraftig vind laga bølgjene som har skada moloar, det er ei indirekte skade etter Naturskadelova, seier Tron Reidar Bøe som er seniorrådgjevar i Landbruksdirektoratet.

Mangla seks centimeter

I fylgje Kartverket mangla det seks centimeter på stormflo etter krava i Naturskadelova, då hjelp det lite at stormen faktisk smadra moloen.

– Alle forstår at skadane skuldast stormen, men det gjer det ikkje etter Naturskadelova, seier Bøe.

For ekteparet på Vingelven er moloen livsnerven til omverda. Ekteparet dreg på åra.

– Steinane i innløpet til moloen gjer at ein kjem seg til og frå berre på flo sjø. Ved neste storstorm ryk vel resten av moloen, sukkar Rolf Vingelven.

– Eg synest det er ei skam

Etter orkanen «Dagmar» betalte Naturskadefondet ut 1,1 milliard kroner i erstatning.

I over hundre år har garden Vingelven hatt ei oppsynsrolle med det særs viktige helleristningsområdet Vingen i Bremanger.

Arkeolog Trond Lødøen ved Universitetet i Bergen har derfor engasjert seg i saka.

– Eg synest det er ei skam. Rolf Vingelven har hjelpt oss med bevaring av Vingen i mange år, men når han treng hjelp då sviktar storsamfunnet.

• Les også: Slik herja stormen «Tor»

– Det blir ikkje hjelp i å vere her

Rolf si niese, Kristin Farestveit, har overteke garden og moloen i Vingelven. Familien vil ha garden som feriebustad.

Men Rolf Vingelven fryktar at den øydelagde moloen er starten på slutten.

– Det ser ikkje lyst ut. Utan molo så er ikkje det hjelp i å vere her i det heile tatt.

• Les også: KrF om nei til erstatning: – Dette er absurd og stikk i strid med sunn fornuft